ఆఫీస్‌లో ఇలా వద్దు!

మనిషన్నాక భావోద్వేగాలు సహజం. అయితే పాజిటివ్ ఎమోషన్స్ వల్ల ఎలాంటి సమస్యలూ తలెత్తకపోయినా, నెగెటివ్ ఎమోషన్స్ మాత్రం మానసికంగా కుంగదీస్తాయి. ముఖ్యంగా పనిచేసే చోట ఇలాంటి భావోద్వేగాలు అస్సలు ప్రదర్శించకూడదంటున్నారు నిపుణులు. లేదంటే వాటి ప్రభావం మన కెరీర్‌పై పడే అవకాశాలున్నాయంటున్నారు. అవేంటో తెలుసుకుందాం రండి..

కోపమొస్తోందా..?

'అబ్బబ్బా.. ఎంత చేసినా ఈ పని మాత్రం అయిపోవట్లేదు.. దీనికి తోడు ఎవరైనా రాకపోతే వారి పనీ నేనే చేయాలి..' అంటూ కోపం తెచ్చుకుంటుంటారు కొంతమంది. అయితే దీనివల్ల నిరాశానిస్పృహలు ఆవహించడం తప్ప మరే ప్రయోజనమూ ఉండదు. ఇక ఆ సమయంలో ఎవరు మాట్లాడించినా ఆ కోపాన్నంతా వారిపై చూపిస్తుంటారు. ఇలాంటి ధోరణి పనిచేసే చోట అస్సలు మంచిది కాదంటున్నారు నిపుణులు. ఇలా చేయడం వల్ల ఇటు మీ పనీ పూర్తి కాదు.. అటు ఇతరులతోనూ అభిప్రాయభేదాలు ఏర్పడతాయి. కాబట్టి పని భారం ఎక్కువగా ఉన్నప్పుడు కోపం తెచ్చుకోకుండా శాంతంగా ఆలోచించాలి. ఈరోజే కచ్చితంగా పూర్తిచేయాల్సిన పనులేంటో చూసుకొని మీకున్న సమయంలోనే వాటిని పూర్తి చేయడానికి ప్రాధాన్యం ఇవ్వాలి. ఆ తర్వాత సమయం ఉంటే మిగతా పనులు చేయడం, లేదంటే వాటిని మరుసటి రోజు పూర్తిచేయడం.. ఇలాంటి చిన్న చిన్న ప్రత్యామ్నాయ మార్గాల్ని అనుసరిస్తే.. పని ఎక్కువగా ఉందన్న చికాకు మీపై పడకుండా ఉంటుంది.

ఏడుస్తున్నారా?

మంచి మంచి ఉద్యోగాలు చేస్తూ ఉన్నత స్థానాల్లో కొనసాగుతున్న వారికి కూడా ఇటు వృత్తిపరంగా, అటు వ్యక్తిగతంగా ఎన్నో సమస్యలుంటాయి. అయితే కొందరు ఈ రెండింటినీ సమన్వయం చేసుకోలేక సతమతమవుతుంటారు. ఈ భావోద్వేగాల్ని అదుపు చేసుకోలేక అక్కడే ఏడ్చేస్తుంటారు. కానీ ఇలా సహోద్యోగుల ముందు, పైఅధికారుల ముందు ఏడవడం వల్ల వారికి మీరు చులకనయ్యే అవకాశముంది. కాబట్టి సమస్య ఏదైనా భావోద్వేగాల్ని అదుపు చేసుకోవడం, వాటి ప్రభావం చేసే పనిపై పడకుండా చూసుకోవడం ఉత్తమం. మరీ అంతలా బాధనిపిస్తే మీకు కాస్త క్లోజ్‌గా ఉన్న సహోద్యోగులతో లేదంటే మీ కుటుంబ సభ్యులతో పంచుకొని దాని పరిష్కారం కోసం వారి సహాయం తీసుకోవడంలో తప్పు లేదు.

అసూయకు దూరం..

కొందరికి పని విషయంలో చక్కటి ఆలోచనలు రావచ్చు.. దాంతో వారు పైఅధికారుల మెప్పు పొందచ్చు. అయితే ఇలాంటి సందర్భాల్లో కొందరు వారిపై అసూయ పడుతుంటారు. 'అబ్బా.. ఆ మాత్రం పనికే అంత పొగడాలా..' అంటూ వారిపై ఈర్ష్యాద్వేషాలు పెంచుకుంటుంటారు. కానీ ఇలాంటి వాటి వల్ల ఇతరులకు మీపై చెడు అభిప్రాయం కలగడం తప్ప మరే ప్రయోజనమూ ఉండదు. కాబట్టి సహోద్యోగుల విషయంలో ఇలా ఆలోచించడం మాని.. మీకు తెలియని విషయాలు వారి నుంచి తెలుసుకోవడానికి ప్రయత్నించాలి. ఉద్యోగులందరితో స్నేహపూర్వకంగా మెలుగుతూ.. వారి విజయాన్ని మనస్ఫూర్తిగా అభినందించడం నేర్చుకోవాలి.

అభద్రతా?

కొత్తగా ఉద్యోగంలో చేరినా, అందులో కొన్నేళ్ల అనుభవం గడించినా కొందరికి వారు చేసే ఉద్యోగం పట్ల అభద్రతా భావం ఉంటుంది. పని విషయంలో ఎప్పటికప్పుడు అప్‌డేట్ కాకపోవడం, ప్రతి విషయంలోనూ ఇతరులతో పోల్చుకోవడం.. వల్ల ఈ సమస్య వస్తుంది. తద్వారా మీపై మరింత ఒత్తిడి పడి, చేస్తున్న పని కూడా సరిగ్గా చేయలేరు. కాబట్టి పని విషయంలో అప్‌డేటెడ్‌గా ఉండడం, ఇతరులతో పోల్చుకోవడం మాని మీకు తెలియని విషయాలను సహోద్యోగులను అడిగి తెలుసుకోవడం వల్ల అభద్రత మీ దరి చేరకుండా జాగ్రత్తపడచ్చు. అలాగే కెరీర్‌లోనూ రాణించచ్చు.