United States: అమెరికాలో కాల్పులు..ఓ ఇంట్లో నలుగురి మృతి

వాషింగ్టన్‌: అమెరికా(United States)లోని మెనే (Maine) రాష్ట్రంలో మంగళవారం కాల్పుల ఘటన చోటు చేసుకొంది. బౌడోయిన్‌ ప్రాంతంలోని ఓ ఇంటిలో జరిగిన కాల్పుల్లో నలుగురు మృతి చెందారు. అనంతరం 295వ నంబర్‌ హైవేపై కూడా పలు వాహనాలపై కాల్పులు చోటు చేసున్నాయి. పోర్ట్‌ల్యాండ్‌ - బౌడోయిన్‌ మధ్య ఈ ఘటన జరిగింది. ఈ దాడిలో మరో ముగ్గురు తీవ్రంగా గాయపడినట్టు పోలీసులు తెలిపారు. రెండు చోట్ల జరిగిన కాల్పులకు సంబంధం ఉందని అధికారులు వెల్లడించారు. ఈ ఘటనతో స్థానికులు భయాందోళనకు లోనయ్యారు. దీంతో హైవేలో కొంత భాగాన్ని గంటన్నర పాటు పోలీసులు మూసివేశారు. ప్రజలు ఎవరూ బయటికి రావొద్దని నిషేధాజ్ఞలు జారీ చేశారు. సామాన్యలకు ఎటువంటి ప్రమాదం లేదని నిర్ధారించుకున్నాక ఆంక్షలు ఎత్తివేశారు.

బౌడోయిన్‌లోని ఓ ఇంటిలో నలుగురి మృతికి కారణమైనట్లు అనుమానిస్తున్న జోసెఫ్‌ ఈటన్‌(34) అనే వ్యక్తిని పోలీసులు అరెస్టు చేశారు. నిందితుడిని ఈ వారం కోర్టులో హాజరుపరుస్తామని పోలీసులు వెల్లడించారు. అయితే కాల్పులకు గల కారణాలు మాత్రం తెలియరాలేదు. ఈ ఘటనపై ఆ రాష్ట్ర గవర్నర్‌ జానెట్‌ మిల్స్‌ స్పందించారు. ‘‘ఈ రోజు జరిగిన హింసాత్మక ఘటనలు మన రాష్ట్రాన్ని కదిలించాయి. వీటి గురించి తెలియగానే ఒక్కసారిగా షాక్‌కు గురయ్యాను’’ అని ట్వీట్‌ చేశారు.