ఉత్తర కొరియాలో మానవ హక్కుల హననం

స్వలింగ సంపర్కులతోపాటు చిన్న నేరాలకు పాల్పడిన వారికీ మరణ శిక్షలు
 దక్షిణ కొరియా నివేదిక వెల్లడి

ప్యాంగ్యాంగ్‌: ఉత్తర కొరియాలో గర్భిణులను, స్వలింగ సంపర్కులను ఉరితీస్తూ ఆ దేశం మానవ హక్కులను ఉల్లంఘిస్తోందని దక్షిణ కొరియా వెల్లడించింది. ఆ దేశ అధ్యక్షుడు కిమ్‌ జోంగ్‌ ఉన్‌ ఆగడాలు మితిమీరుతున్నాయని పేర్కొంది. ఈ మేరకు దక్షిణ కొరియా యునిఫికేషన్‌ మినిస్ట్రీ గురువారం 450 పేజీల నివేదికను వెలువరిచింది. ఉత్తర కొరియా ప్రజల జీవించే హక్కు పెనుప్రమాదంలో పడిందని, చట్టంలో లేని, మరణశిక్షకు అనర్హమైన కేసులకు సైతం ఉరిశిక్షలు విధిస్తున్నారని దక్షిణ కొరియా ఆందోళన వ్యక్తం చేసింది. మతపరమైన కార్యకలాపాలకు యత్నించడం, మూఢనమ్మకాలు, డ్రగ్స్‌ వినియోగించడం, దక్షిణ కొరియాకు చెందిన వీడియోలను వీక్షించడం వంటి వాటిని తీవ్రమైన నేరాలుగా పరిగణిస్తూ మరణ దండన విధిస్తున్నారని పేర్కొంది. కిమ్‌ రాజ్యంలో కఠిన నిబంధనలను భరించలేక 2017-2022 మధ్య ఇతర దేశాలకు వలస వెళ్లిన 500 మంది ఉత్తర కొరియన్లను విచారించి దక్షిణ కొరియా ఈ నివేదిక వెలువరించింది. ‘‘ఉత్తర కొరియా వ్యవస్థాపకుడు కిమ్‌ ఇల్‌ సంగ్‌ చిత్రపటాన్ని చూపిస్తూ నృత్యం చేసిన ఓ ఆరు నెలల గర్భిణిని బహిరంగంగా ఉరితీశారు. ఓ స్టేడియంలో ఆరుగురు టీనేజర్లు మత్తు మందు సేవించడంతోపాటు దక్షిణ కొరియాకు సంబంధించిన వీడియోను చూస్తున్నారని వారిని కాల్చి చంపారు. స్వలింగ సంపర్కులు, మత కార్యక్రమాలు నిర్వహించేవారు, విదేశాలకు పారిపోయేందుకు యత్నించిన వారికీ ఉరిశిక్షలు విధిస్తున్నారు. దేశంలోని మరుగుజ్జుల జాబితాను తయారు చేయమని నర్సులపై పాలనా యంత్రాంగం ఒత్తిడి చేసింది. ఓ మరుగుజ్జు మహిళ గర్భాశయాన్ని తొలగించడానికి శస్త్రచికిత్స చేయించింది. బలవంతంగా మానవ ప్రయోగాలూ నిర్వహిస్తున్నారు’’ అని దక్షిణ కొరియా నివేదిక వెల్లడించింది.