బంగ్లాదేశ్‌ పడవ ప్రమాదంలో 50కు చేరిన మృతుల సంఖ్య

ఢాకా: ఉత్తర బంగ్లాదేశ్‌లోని పురాతన ఆలయానికి భక్తులతో బయలుదేరి.. పడవ బోల్తాపడిన దుర్ఘటనలో మృతుల సంఖ్య 50కు చేరింది. అధికారులు సోమవారం మరో 25 మృతదేహాలను వెలికి తీయించారు. దుర్గాపూజల ప్రారంభ సందర్భంగా అందరూ బోదేశ్వరి ఆలయానికి వెళుతుండగా ఆదివారం ఈ ఘోర ప్రమాదం జరిగింది. పంచగఢ్‌ జిల్లా పరిధిలోని కొరొటోవా నదిలో పడవ బోల్తాపడింది. మృతుల్లో 25 మంది మహిళలు, చిన్నపిల్లలు 13, పురుషులు 12 మంది ఉన్నారు. ప్రత్యక్షసాక్షుల కథనం మేరకు.. ప్రమాద సమయంలో పడవలో 150 మందికి పైగా ప్రయాణికులు ఉన్నారు. వీరిలో చాలామంది ఈదుకొంటూ తీరానికి చేరారు. ఇంకా 34 మంది ఆచూకీ తెలియాల్సి ఉంది.