Germany: చైనాపై ఆధార పడటాన్ని తగ్గించుకోవాలి: జర్మనీ సరికొత్త ప్లాన్ సిద్ధం

ఇంటర్నెట్‌డెస్క్‌: చైనా(China) పారిశ్రామిక రంగానికి మరో గట్టి షాక్‌ తగలనుంది. ఆ దేశంపై ఆధారపడటాన్ని తగ్గించుకొనేందుకు ఐరోపాలోనే అతిపెద్ద ఆర్థిక శక్తి అయిన జర్మనీ ప్లాన్‌ను సిద్ధం చేసింది. ఈ మేరకు ‘స్ట్రాటజీ ఆన్‌ చైనా’ పేరిట 40 పేజీల వ్యూహపత్రాన్ని గురువారం విడుదల చేసింది. దీనిలో బీజింగ్‌పై ఆధారపడటాన్ని తగ్గించుకొనేందుకు బెర్లిన్‌ అనుసరించాల్సిన కఠిన నిబంధనలను వెల్లడించంది. ఇది నిజంగా చైనాకు షాకిచ్చే విషయం.

‘‘చైనా మారిపోయింది. ఆ దేశ రాజకీయ నిర్ణయాలు, మార్పుల కారణంగా మేము కూడా చైనా విషయంలో అనుసరించే వైఖరిని మార్చుకోవాల్సి ఉంది’’ అని ఆ వ్యూహపత్రంలో పేర్కొంది. ‘‘తన స్వప్రయోజనాలను కాపాడుకోవడానికి అది (చైనా) తీవ్రంగా పనిచేస్తోంది. ఇందు కోసం అంతర్జాతీయ నిబంధనలు కూడా మార్చేందుకు ప్రయత్నించడం ప్రపంచ భద్రతకు ఇబ్బందికరంగా మారింది’’ అని ఆ పత్రంలో పేర్కొన్నారు. జర్మనీ ఛాన్సలర్‌ ఒలాఫ్‌ షోల్జ్‌ నేతృత్వంలోని మూడు పార్టీల కూటమి ప్రభుత్వం కొన్ని రోజులపాటు మల్లగుల్లాలు పడి చివరికి దీనికి ఆమోద ముద్రవేసింది. చైనాలో వ్యాపారం, పెట్టబడులను కొనసాగిస్తూనే.. ఆ దేశంపై ఆధారపడటాన్ని తగ్గించుకోవాలని నిర్ణయించింది.

•  ఇదీ చదవండి : ప్రధాని మోదీకి అరుదైన గౌరవం.. ఫ్రాన్స్‌ అత్యున్నత అవార్డుతో సత్కారం

ముఖ్యంగా ఔషధాలు, విద్యుత్తు కార్లలో వాడే లిథియం బ్యాటరీలు, చిప్స్‌ తయారీ ముడిసరుకుల విషయంలో దీనిని అమలు చేయనుంది. ఈ వ్యూహ పత్రంపై దేశ ఛాన్సలర్‌ ఒలాఫ్‌ షోల్జ్‌ ట్వీట్‌చేశారు. ‘‘మేము చైనా నుంచి విడిపోవాలనుకోవడంలేదు. కానీ, కీలక విషయాల్లో ఆధారపడటాన్ని తగ్గించుకోవాలనుకొంటున్నాం’’ అని పేర్కొన్నారు. చైనాలో మానవహక్కుల ఉల్లంఘనలు పెరిగాయనే విమర్శలు వస్తున్న నేపథ్యంలో ఈ నిర్ణయం తీసుకొంది. బెర్లిన్‌కు బీజింగ్‌ అత్యంత కీలకమైన వ్యాపార భాగస్వామి. 2022లో ఇరుదేశాల మధ్య 300 బిలియన్‌ డాలర్ల విలువైన ఎగుమతులు జరిగాయి.