White House: ప్రధాని పిలుపు మేరకు శ్వేతసౌధం విందులో చిరుధాన్యాల వంటకాలు..!

ఇంటర్నెట్‌డెస్క్‌: ప్రపంచ వ్యాప్తంగా చిరుధాన్యాలను ప్రచారంలోకి తీసుకెళ్లాలని ప్రధాని మోదీ చేస్తున్న యత్నానికి అమెరికా తొలి మహిళ జిల్‌ బైడెన్‌ స్పందించారు. నేడు శ్వేత సౌధం(White House) మోదీ గౌరవార్థం ఏర్పాటు చేసిన అధికారిక విందు మెనూలో చిరుధాన్యాల వంటకాలను కూడా చేర్చారు. ఆమె గెస్ట్‌ చెఫ్‌ నీనా కుర్టిస్‌తో కలిసి పనిచేస్తున్నట్లు శ్వేత సౌధం ఎగ్జిక్యూటివ్‌ చెఫ్‌ క్రిస్‌ వెల్లడించారు. ఈ అధికారిక విందుకు సంబంధించిన మెనూను శ్వేతసౌధం పేస్ట్రీ చెఫ్‌ సుసీ మారిసన్‌ తయారు చేశారు.

విందులో ఫస్ట్‌కోర్స్‌లో.. మారినేటెడ్‌ మిల్లెట్‌, గ్రిల్డ్‌ కార్న్‌ కెర్నల్‌ సలాడ్‌, పుచ్చకాయ, అవకాడో సాస్‌ అందించనున్నారు. ఇక మెయిన్‌ కోర్స్‌లో స్టఫ్డ్‌ పోర్టబెల్లో మష్రూమ్స్‌, కుంకుమ పువ్వుతో కూడిన రిసోటో, లెమెన్‌ దిల్‌ యోగర్ట్‌ సాస్‌, క్రిస్ప్‌డ్‌ మిల్లెట్‌ కేక్స్‌, వేసవి పానీయాలు ఉండనున్నాయి. 

ప్రధాని మోదీ మార్చిలో చిరుధాన్యాల (శ్రీ అన్న) సదస్సును భారత్‌లో ప్రారంభించిన విషయం తెలిసిందే. వ్యవసాయంలో రసాయనాల కారణంగా సమస్యలు వస్తున్నాయని.. వాటికి ‘శ్రీఅన్న’ పరిష్కారం చూపుతుందని ఈ సందర్భంగా వెల్లడించారు. ఐరాస కూడా 2023ను అంతర్జాతీయ చిరుధాన్యాల సంవత్సరంగా ప్రకటించింది.