Stomach Pain: కడుపు నొప్పితో ఆస్పత్రికి.. ‘ఎక్స్‌-రే’ చూస్తే షాక్‌!

ఖాఠ్‌మాండూ: కడుపు నొప్పితో ఆస్పత్రికి వెళ్లిన ఓ యువకుడిని పరిశీలించిన వైద్యులకు ఊహించని అనుభవం ఎదురైంది. కారణం అతడి పొట్టలో ఏకంగా 15 సెంటీమీటర్ల పొడవైన చాకు (Knife Blade) కనిపించింది. ఆ పదునైన వస్తువు కారణంగా బాధితుడి అంతర్గత అవయవాలకు ఎలాంటి గాయాలు కాకపోవడం గమనార్హం. నేపాల్‌ (Nepal)లో ఈ వ్యవహారం వెలుగుచూసింది. ఈ కేసుకు సంబంధించిన వివరాలు ‘క్యూరియస్‌’ జర్నల్‌లో ప్రచురితమయ్యాయి.

నేపాల్‌కు చెందిన ఓ 22 ఏళ్ల యువకుడు కడుపు నొప్పితో బాధపడుతూ ఇటీవల ఆస్పత్రికి వెళ్లాడు. అయితే, అతడిలో వికారం, విరేచనాలు, వాంతులు వంటి లక్షణాలేవి కనిపించలేదు. రక్త స్థాయిలు సాధారణంగా ఉన్నట్లు వైద్యులు గుర్తించారు. ఈ క్రమంలోనే అతడి శరీరాన్ని పరిశీలించగా.. పొట్ట కుడిభాగంలో కుట్లు వేసి ఉన్న గాటు కనిపించింది. ఏం జరిగిందని వైద్యులు ప్రశ్నించగా.. అంతకుముందు రోజు గొడవ జరిగిందని, ఈ క్రమంలో గాయమైందని తెలిపాడు.

భారత్‌తో విభేదాలు.. ఆ ‘ఐదు కళ్ల’నే నమ్ముకొన్న ట్రూడో..!

దీంతో వైద్యులు ‘ఎక్స్‌-రే’ తీయించగా.. పొట్టలో 15 సెం.మీల పొడవైన చాకు ఉన్నట్లు తేలింది. ఈ విషయం తెలిసి ఆశ్చర్యపోయిన వైద్యులు.. శస్త్రచికిత్స నిర్వహించి ఆ వస్తువును తొలగించారు. ఆ చాకు ఒక వైపు నుంచి మరొక వైపునకు తిరిగినప్పటికీ.. పొట్ట భాగంలోని అవయవాలు ఏవీ తీవ్రంగా దెబ్బతినలేదని వైద్యులు తెలిపారు. 

చాకు పొడిచినప్పుడు పెద్ద గాయమేమీ కాకపోవడం, పైగా మద్యం మత్తులో ఉండటంతో ఏం జరిగిందో బాధితుడు గుర్తించలేకపోయినట్లు ఓ వార్తాసంస్థ తెలిపింది. ఘటన జరిగిన రోజు స్థానికంగానే ఓ ఆరోగ్య కార్యకర్త అతడి గాయానికి కుట్లు వేసినట్లు పేర్కొంది. తరువాతి రోజు పొట్ట భాగంలో అసౌకర్యంగా అనిపించడంతో అతడు వైద్యుల వద్దకు వెళ్లగా.. అసలు విషయం బయటపడింది.