ఓ మగువా నీ మాటల కోసం..

అవీ ఇవీ...

ఓ మగువా నీ మాటల కోసం..

ఫుట్‌బాల్‌ ప్రపంచకప్‌ అయినా.. క్రికెట్‌ ప్రపంచకప్‌ అయినా.. క్రికెట్‌ లీగ్‌లు అయినా ఆమె కనబడితే కళ్లు జిగేలే! అందంతోనే కాదు మాటలతో ఆకట్టి పడేసే ఈ భామ టీవీలో కనబడితే అభిమానులకు కనువిందూ.. వీనుల విందూ రెండూనూ! క్రికెట్‌, ఫుట్‌బాల్‌ ప్రేమికులకు ప్రత్యేకంగా పరిచయం అక్కర్లేని ఆ పేరు మయంతి లాంగర్‌. స్టార్‌స్పోర్ట్స్‌ యాంకర్‌గా తనదైన ముద్ర వేసిన ఈ మగువ.. క్రికెట్‌ ప్రపంచకప్‌లో ప్రత్యేక ఆకర్షణగా నిలుస్తోంది.

2010 ఫిఫా ప్రపంచకప్‌.. ఈఎస్‌పీఎన్‌ స్టార్‌స్పోర్ట్స్‌ టీవీ ప్రెజెంటర్‌గా తొలిసారి మయంతి కనబడిందప్పుడే. చూడగానే ఆకట్టుకునే రూపంతో పాటు ఫుట్‌బాల్‌పై ఎంతో అనుభవం ఉన్న దానిలా గలాగలా ఆమె మాట్లాడుతుంటే అభిమానులకు ఊపిరాడలేదు. ఆమె టీవీ ప్రెజెంటర్‌గా మయంతి విజయవంతం కావడానికి తొలి అడుగుపడింది అప్పుడే. ఈమె ఫుట్‌బాల్‌కి మాత్రమే పరిమితం కాలేదు.. క్రికెట్‌ యాంకరింగ్‌లోనూ ఆకట్టుకుంది. 2010 దిల్లీ వేదికగా జరిగిన కామన్వెల్త్‌ క్రీడలకూ టీవీ ప్రెజెంటర్‌గా చేసింది. అంతకుముందు మహిళా టీవీ ప్రెజెంటర్లు ఉన్నా.. ఆటపై మయంతికి ఉన్న జ్ఞానం, సమయస్ఫూర్తి అందర్ని ఆకర్షించాయి. ముఖ్యంగా ఐపీఎల్‌.. 2011, 2015 క్రికెట్‌ ప్రపంచకప్‌లలో మయంతి తన వాక్పటిమతో అభిమానులకు దగ్గరైపోయింది.

ట్రోల్‌ చేసినా తగ్గలేదు..
స్టువర్ట్‌ బిన్నీని పెళ్లి చేసుకున్నాక.. ఆమె కెరీర్‌లో క్రికెటే ప్రధానం అయిన తర్వాత అభిమానుల నుంచి ట్రోలింగ్‌ మొదలైంది. దీనికి కారణం ఆమె వస్త్ర ధారణే. ఒక టీ షర్టు.. దానిపై ఒక చిన్న స్కర్టు.. ఆపై ఐదంగుళాల హీల్స్‌! ఇలా ఆమె యాంకరింగ్‌ చేస్తుంటే ఆమెను సోషల్‌ మీడియాలో ఫాలో అయ్యే వాళ్లే కాదు.. ట్రోల్‌ చేసేవాళ్లు కూడా పెరిగిపోయారు. ముఖ్యంగా బిన్నీ క్రికెట్లో విఫలం అయినప్పుడు ఆమెను ట్రోలర్స్‌ బాగా వేధించేవాళ్లు. కానీ మయంతి మాత్రం ఎప్పుడూ తగ్గలేదు. ట్విటర్‌ వేదికగా తనను, భర్తను ట్రోల్‌ చేస్తున్న వారికి తన మాటల బాణాలతో బుద్ధి చెప్పేది. తాను పద్దెమిదేళ్లకే ఒక ఉద్యోగంలో చేరానని.. ఇలా పనికి రాని ట్వీట్లు చేసుకుంటూ కూర్చోలేదని ఆమె ఘాటుగా సమాధానం చెప్పింది.

ఫుట్‌బాల్‌ ఆడి..
దిల్లీలో పుట్టి బాల్యమంతా అమెరికాలో గడిపిన మయంతికి చిన్నప్పటి నుంచి ఫుట్‌బాల్‌ అంటే చాలా ఇష్టం. చదువు కోసం మళ్లీ దిల్లీ వచ్చేసిన ఈ భామ తన పాఠశాల తరఫున ఫుట్‌బాల్‌ ఆడేది. దిల్లీ సూపర్‌ సాకర్‌ అకాడమీలో శిక్షణ పొందిన ఆమె ఆ తర్వాత ఆటను వదిలేసింది. చదువు అయ్యాక మొదట గ్రాఫిక్‌ డిజైనర్‌గా కెరీర్‌ను ప్రారంభించాలని అనుకుంది. కానీ ఫిఫా బీచ్‌ ఫుట్‌బాల్‌కు యాంకర్‌గా ఎంపిక కావడం మయంతి కెరీర్‌ను మలుపు తిప్పింది. ఆ తర్వాత జీ స్పోర్ట్స్‌లో ఫుట్‌బాల్‌ కేఫ్‌ అనే షోకు పని చేసిన మయంతి..నెహ్రూ కప్‌కు కూడా యాంకర్‌గా చేసింది. 2008లో ఇండియన్‌ క్రికెట్‌ లీగ్‌తో తొలిసారి క్రికెట్‌కు టీవీ ప్రెజెంటర్‌గా పని చేసిన మయంతి పేరు 2010 ఫిఫా ప్రపంచకప్‌తో అందరికి తెలిసిపోయింది. 2012లో క్రికెటర్‌ స్టువర్ట్‌ బిన్నీని పెళ్లాడిన మయంతి.. ఇక తన కెరీర్‌ను ప్రధానంగా క్రికెట్‌కే కేటాయించింది. స్టార్‌ స్పోర్ట్స్‌ ఐపీఎల్‌ ప్రసార హక్కులు సొంతం చేసుకున్నాక ఆ లీగ్‌ సమయంలో ఛానెల్‌ ముఖచిత్రంగా మారిపోయింది మయంతి.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు