close

ప్రధానాంశాలు

Facebook Share Twitter Share WhatsApp Share Telegram Share
భయమే శత్రువు

కరోనా భయంతో పెరిగిన ఆత్మహత్యలు
మానసిక కుంగుబాటు
ఈనాడు - అమరావతి

తూర్పుగోదావరి జిల్లాకు చెందిన ధాన్యం వ్యాపారి తన అత్త మామల ఇంటికి భోజనానికి వెళ్లారు. రెండు రోజుల తర్వాత అత్తకు కరోనా వచ్చినట్టు తెలిసింది. దీంతో తనకూ వస్తుందన్న భయంతో కాలవలో దూకి ఆత్మహత్య చేసుకున్నారు.

శ్రీకాకుళం జిల్లాలో విశ్రాంత ఉద్యోగి ఒకరు కరోనా అంటేనే తీవ్ర ఆందోళనకు గురయ్యేవారు. చివరకు తనకు ఏమవుతుందోనని భయంతో ఆత్మహత్యకు పాల్పడ్డారు.

కృష్ణాజిల్లాలో కుమారుడికి కొవిడ్‌ సోకిందన్న బాధతో ఒక తండ్రి కృష్ణా కాలువలో దూకి ఆత్మహత్యాయత్నం చేశారు.

కరోనా మహమ్మారి కొందరి ఉసురు తీస్తుంటే.. వ్యాధి భయం మరికొందరి ప్రాణాల్ని బలిగొంటోంది. కరోనా క్రమంగా మన వీధిలోకి, ముంగిట్లోకి వచ్చేసింది. అందరూ జాగ్రత్తలు తీసుకుంటూనే దైనందిన వ్యవహారాలు కొనసాగిస్తున్నారు. కానీ కొందరు వ్యాధి పేరు చెబితే వణికిపోతున్నారు. ఎక్కువ మానసిక ఆందోళనకు, ఒత్తిడికి గురవుతూ, అతిగా స్పందించే గుణం ఉన్నవారు కరోనాకు తీవ్రంగా భయపడుతున్నారు. తమకూ సోకితే కుటుంబసభ్యులు ఏమవుతారోనన్న భయం, ఆసుపత్రికి వెళితే రూ.లక్షల్లో ఖర్చవుతుందేమోనన్న ఆందోళన, అనిశ్చితి, ఆర్థిక కష్టాల వంటివి చాలామందిని మనోవేదనలోకి నెట్టేస్తున్నాయి. దాన్నుంచి బయటపడలేక ఆత్మహత్యకు ఒడిగడుతున్నారు. కరోనా వ్యాప్తి మొదలయ్యాక.. మానసిక ఆందోళనకు గురయ్యేవారి సంఖ్య 20% పెరిగిందని వైద్యులు చెబుతున్నారు. కుటుంబసభ్యులు ధైర్యం చెప్పడం, కౌన్సెలింగ్‌, మందులు వాడటం ద్వారా మనోవేదన, మానసిక కుంగుబాటు నుంచి బయటపడొచ్చని చెబుతున్నారు. మనలో ప్రతి ఒక్కరికీ భయాలుంటాయి. పామును చూసినా, ఎవరైనా దాడి చేస్తారనుకున్నా భయపడతాం. కాసేపటికి సర్దుకుని, భయం నుంచి బయటపడతాం. కానీ కొందరికి ఆందోళనతో కూడిన మానసిక ప్రవృత్తి ఉంటుంది.

లేనిదాన్ని ఎక్కువగా ఊహించుకోవడం, చిన్న విషయాల్ని భూతద్దంలో చూడటం వంటివి వీరి లక్షణాలు. భయానికి కారణం మన మెదడే. ప్రమాదాన్నో, విపత్తునో ఎదుర్కొనేలా శరీరాన్ని అప్రమత్తం చేసే వ్యవస్థ మెదడులో ఉంటుంది. మెదడులోని ‘లింబిక్‌ సిస్టం’లో ఉండే ఎమిగ్డిలా, హైపోథాలమస్‌ అనే భాగాలు దీన్ని నియంత్రిస్తాయి. మనిషి శరీరంలో భావోద్వేగాల్ని న్యూరోట్రాన్స్‌మిటర్ల ద్వారా ప్రేరేపించేవి, నియంత్రించేవి అవే. మెదడు ఇచ్చే సంకేతాల మేరకు శరీరం సీరోటానిన్‌, ఎడ్రినలిన్‌ అనే రసాయనాలను విడుదల చేస్తుంది. వీటివల్లే మనకు భయం కలుగుతుంది. కాసేపటికి న్యూరోట్రాన్స్‌మిషన్‌ నిలిచిపోయి ధైర్యం వస్తుంది. మొదట్లో భయపడ్డా.. ఆ పరిణామానికి అలవాటు పడటాన్ని ‘అడాప్టేషన్‌’ అంటారు. ఎవరైనా కరోనాతో మరణించినట్లు తెలిస్తే 10 నిమిషాలు, తెలిసినవారు చనిపోతే అరగంట భయపడతాం. దేనికి ఎంతసేపు భయపడాలో మెదడే నిర్ణయిస్తుంది. ఇదంతా సాధారణ వ్యక్తుల్లో జరిగే ప్రక్రియ. కానీ కొందరిలో న్యూరోట్రాన్స్‌మిషన్‌ వ్యవస్థ ఆగాల్సినప్పుడు ఆగదు. అలాంటివారు చిన్న చిన్న విషయాలకే ఎక్కువ భయపడతారు. ఇప్పుడు కరోనా వారిని మరింత తీవ్ర ఆందోళనకు, మానసిక కుంగుబాటుకు గురిచేస్తోంది. వారిలో భావోద్వేగాల సమతుల్యత లోపించడమే దానికి కారణం.
మధ్య వయస్కుల్లోనే ఎక్కువ
కరోనా భయంతో మానసిక వైద్యుల వద్దకు కౌన్సెలింగ్‌ కోసం వెళ్లేవారిలో 30-50 ఏళ్ల మధ్యవారే ఎక్కువగా ఉంటున్నారు. పిల్లలు జీవితంలో స్థిరపడకపోవడం, బాధ్యతలు తీరకపోవడం వంటివి వారిలో భయాలకు కారణం. 60 ఏళ్లు దాటినవారు జీవితంలో అప్పటికే ఢక్కామొక్కీలు తిని ఉంటారు కాబట్టి, వారిలో మనోబలం ఎక్కువ.
చికిత్స ఉంది

- డా.ఎన్‌.ఎన్‌.రాజు, మానసికవైద్య నిపుణులు, కేజీహెచ్‌, విశాఖపట్నం

కరోనా భయంతో చికిత్సకు వచ్చేవారి సంఖ్య బాగా పెరిగింది. వారికి కౌన్సెలింగ్‌, మందులతో నయం చేయవచ్చు. ఆత్మహత్య చేసుకోవాలన్న ఆలోచన రాకుండా చేయవచ్చు. సామాజిక మాధ్యమాల్లో వచ్చే అసంబద్ధ సమాచారం కూడా దానికి కారణం. చాలామందికి కరోనా నయమవుతుందని, మృతులు చాలా తక్కువన్న విషయాన్ని వారికి అర్థమయ్యేలా చెప్పాలి. ఒకే పనిని, రోజూ నిర్దిష్ట సమయంలో చేయడం వల్ల బ్రెయిన్‌ సిస్టమ్‌ బ్యాలెన్స్‌ అవుతుంది. యోగా, ధ్యానం చేస్తే పరిస్థితులకు అలవాటు పడే గుణం పెరుగుతుంది. కుటుంబసభ్యులు వారిపై మితిమీరిన శ్రద్ధ చూపించినట్టు కనిపించకూడదు. నీకేం కాదని చెప్పడం కూడా నష్టమే. వారికి ఇష్టమైన సినిమాలు, సాహిత్యం, సంగీతం గురించి, చిన్నప్పటి విషయాలు మాట్లాడటం ద్వారా ఒత్తిడి తగ్గించొచ్చు. వైద్యుల పర్యవేక్షణలోనే మందులు వాడాలి.


ఆత్మహత్యలకు కారణాలు ఇవీ..

‘‘కరోనా వస్తే ఎలాగూ చనిపోతాం. ఆసుపత్రికి వెళ్లినా లక్షలకు లక్షలు బిల్లులు కట్టడం తప్ప ప్రయోజనం ఉండదు’’ ఇలాంటి ప్రతికూల భావనలు మానసికంగా దుర్బలంగా ఉండేవారిలో కలుగుతుంటాయి. దీన్ని మానసిక వైద్య పరిభాషలో రేషనలైజేషన్‌ అంటారు. దీనివల్ల చాలామంది ఆత్మహత్యలకు ప్రయత్నిస్తారు. ఆత్మహత్యకు పాల్పడటానికి శారీరక, సాంఘిక, వ్యక్తిగత కారణాలుంటాయని మానసిక నిపుణులు విశ్లేషిస్తున్నారు.
* జన్యుపరమైన లోపాల వల్ల సహజంగానే తీవ్రంగా స్పందించే, ఆందోళన చెందే స్వభావం ఉన్నవారు.
* కరోనా వస్తే చూడటానికి ఎవరూ లేరని, ఆసుపత్రికి వెళ్లి వైద్యం చేయించుకునే పరిస్థితి లేదనుకున్నవారు. సమాజంలో గుర్తింపు లేదని ఆందోళన చెందేవారు.
* ఇతర దీర్ఘకాలిక వ్యాధులు ఉన్నవారు.. భార్య, పిల్లలు, బంధువులు, మిత్రులు లేకుండా ఒంటరిగా ఉండేవారు.
* ఉపాధి లేక, పేదరికంలో ఉన్నవారు. మత్తుపదార్థాలకు అలవాటు పడ్డవారు.


ఇలా గుర్తించొచ్చు

తీవ్రంగా భయపడేవారు, మనోవేదన చెందేవారు.. పదే పదే అదే విషయం మాట్లాడుతుంటారు. అసహనంగా ఉంటారు. సరిగ్గా నిద్రపోరు. అందరికీ ఫోన్లు చేస్తూ, సందేశాలు పంపుతూ.. అప్పగింతలు చెబుతారు. ముభావంగా, నిర్లిప్తంగా ఉంటారు. పుట్టినరోజు, పెళ్లిరోజుపైనా నిరాసక్తంగా ఉంటారు. అలాంటి లక్షణాలుంటే వారు డిప్రెషన్‌లోకి వెళుతున్నారని అర్థం. కుటుంబసభ్యులు అప్రమత్తమై వారి గురించి పట్టించుకోవాలి.
అనిశ్చితి... ఆర్థిక ఇబ్బందులు కారణం
- డా.నాగిరెడ్డి, మానసిక వైద్య నిపుణులు, కర్నూలు
‘‘కరోనా ఎప్పటికి పోతుందో తెలియని అనిశ్చితి చాలామందిని భయాందోళనలకు గురిచేస్తోంది. కరోనాతో చాలా వృత్తులు దెబ్బతిని ఆర్థిక సమస్యలు చుట్టుముట్టాయి. వచ్చే రెండు మూడు నెలల్లో ఇలాంటి కేసులు ఇంకా పెరిగే అవకాశం ఉంది. కరోనా వస్తుందన్న భయంతో కొంతమందిలో నిద్రపట్టకపోవడం, గుండెదడ వంటివి కనిపిస్తున్నాయి. వారిలో నమ్మకం కలిగించడం, మందులు వాడటమే పరిష్కారం.’’

ప్రధానాంశాలు

జిల్లా వార్తలు

దేవతార్చన


మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.