Telangana News: మహిళా రోగితో అసభ్య ప్రవర్తన.. వైద్యుడికి పదేళ్ల జైలుశిక్ష

హైదరాబాద్‌: వైద్యం కోసం వచ్చిన రోగితో అసభ్యంగా ప్రవర్తించిన వైద్యుడికి నాంపల్లి కోర్టు పదేళ్ల జైలు శిక్ష, రూ.5వేల జరిమానా విధించింది. సికింద్రాబాద్‌ గోపాలపురం పోలీసులు నమోదు చేసిన ఎఫ్ఐఆర్‌ ప్రకారం... శ్వాసకోశ సమస్యలతో బాధపడుతున్న ఓ మహిళ వైద్యం కోసం సికింద్రాబాద్‌లోని భాస్కర్‌ చెస్ట్‌ క్లినిక్‌కు వెళ్లింది. శ్వాసకోశ నిపుణులు విజయ్‌భాస్కర్‌ వైద్యం పేరుతో మహిళ ఛాతిపై చేతులతో తడిమి, ఆ తర్వాత ఆమె రహస్య భాగాలను తాకి ఇబ్బందికి గురిచేశాడు. అనుమానం వచ్చిన బాధితురాలు ప్రశ్నించగా.. చికిత్సలో భాగంగానే అలా చేసినట్టు వైద్యుడు విజయ్‌భాస్కర్‌ తెలిపారు.

2016 సెప్టెంబరు 24న అదే క్లినిక్‌కు వెళ్లిన బాధితురాలితో మరోసారి అదే తరహాలో వ్యవహరించాడు. ఈ విషయం ఎవరికీ చెప్పలేక బాధితురాలు ఇబ్బంది పడింది. 2016 అక్టోబర్ 7న మరోసారి వెళ్లిన బాధితురాలికి అక్కడ ఓ యువతి విజయ్ భాస్కర్‌తో గొడవపడం గమనించింది. కారణం.. ఆరా తీస్తే యువతితోనూ సదరు వైద్యుడు అసభ్యంగా ప్రవర్తించినట్లు తెలిసింది. వైద్యుడి ప్రవర్తనలోనే తేడా ఉన్నట్లు గమనించిన బాధితురాలు ఈ విషయాన్ని తన భర్తకు చెప్పింది. 2016 అక్టోబర్ 8న బాధితురాలు గోపాలపురం పోలీసులకు ఫిర్యాదు చేయగా కేసు నమోదు చేసి డాక్టర్ విజయ్ భాస్కర్‌ని అరెస్ట్ చేశారు. ఆ తర్వాత అతడు బెయిల్‌పై బయటికి వచ్చాడు. గోపాలపురం పోలీసులు సాక్ష్యాధారాలు సేకరించి కోర్టులో ప్రవేశపెట్టారు. వాదోపవాదాలు విన్న తర్వాత న్యాయస్థానం విజయ్ భాస్కర్‌ను  దోషిగా తేల్చింది. పదేళ్ల జైలుశిక్ష, రూ.5వేల జరిమానా విధించింది. 2016లోనే గోపాలపురం పోలీస్ స్టేషన్‌లో విజయ్ భాస్కర్‌పై ఓ యువతి ఫిర్యాదు చేసింది. ఆ కేసులో నాంపల్లి కోర్టు అతన్ని నిర్దోషిగా తేల్చింది. దీన్ని సవాల్ చేస్తూ బాధిత యువతి హైకోర్టులో సవాల్ చేసింది. ప్రస్తుతం ఆ కేసు కూడా విచారణలో ఉందని గోపాలపురం పోలీసులు తెలిపారు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని