Vikram: అరుదైన అవకాశం దక్కించుకున్న ‘విక్రమ్‌’

ఇంటర్నెట్‌ డెస్క్‌: ప్రముఖ నటుడు కమల్‌ హాసన్‌ (Kamal Haasan) కీలక పాత్రలో లోకేశ్‌ కనగరాజ్‌ తెరకెక్కించిన చిత్రం ‘విక్రమ్‌’ (Vikram). ఈ యాక్షన్‌ థ్రిల్లర్‌ సినిమా బాక్సాఫీసు వద్ద ఘన విజయం అందుకున్న సంగతి తెలిసిందే. ఓటీటీలోనూ సత్తా చాటిన ఈ చిత్రం అరుదైన అవకాశాన్ని దక్కించుకుంది. ‘బుసాన్‌ ఇంటర్నేషనల్‌ ఫిల్మ్‌ ఫెస్టివల్‌’ (Busan International Film Festival)లో ప్రదర్శితం కానున్న సినిమాల జాబితాలో నిలిచింది. అక్టోబరు 7న ‘బుసాన్‌ సినిమా సెంటర్‌’, 8న ‘సి.జి.వి. సెంటమ్‌ సిటీ 4’ వేదికగా ఈ చిత్రం సందడి చేయనుంది. ప్రతిష్ఠాత్మకమైన ఈ ఫెస్టివల్‌లో స్క్రీనింగ్‌కు ఎంపికైనందుకు ‘విక్రమ్‌’ చిత్ర నిర్మాణ సంస్థ రాజ్‌కమల్‌ ఫిల్మ్స్‌ ఇంటర్నేషనల్‌ సంతోషం వ్యక్తం చేసింది. ఓపెన్‌ సినిమా కేటగిరీలో విక్రమ్‌ సెలెక్ట్‌ అయిందని తెలిపింది. ఆసియా దేశాలకు సంబంధించిన యువ ప్రతిభను ప్రోత్సహించేందుకు ప్రతి సంవత్సరం ఈ వేడుక నిర్వహిస్తుంటారు. 1996లో ప్రారంభమవగా ఇప్పటికి 26 ఫిల్మ్‌ ఫెస్టివల్స్‌ పూర్తయ్యాయి. ఈ ఏడాది అక్టోబరు 5 నుంచి 14 వరకు ఈ వేడుక జరగనుంది.



మరిన్ని

ap-districts
ts-districts