close

తాజా వార్తలు

ద్రవిడ్‌కు ఊరట! ‘కేసు’ క్లియర్‌ చేసిన సీఓఏ

ముంబయి: టీమిండియా మాజీ సారథి రాహుల్‌ ద్రవిడ్‌పై పరస్పర విరుద్ధ ప్రయోజనాల కేసును క్రికెట్‌ పాలకుల కమిటీ మంగళవారం క్లియర్‌ చేసింది. బెంగళూరులోని జాతీయ క్రికెట్‌ అకాడమీ (ఎన్‌సీఏ) క్రికెట్‌ హెడ్‌ బాధ్యతలు స్వీకరించేందుకు మార్గం సుగమం చేసింది. బంతి ఇప్పుడు బీసీసీఐ అంబుడ్స్‌మన్‌ డీకే జైన్‌ కోర్టులో ఉందని సీఓఏ సభ్యుడు లెఫ్టినెంట్‌ జనరల్‌ రవి తొగ్డె అన్నారు.

‘ద్రవిడ్‌ కేసులో విరుద్ధ ప్రయోజనాల అంశమేమీ లేదు. అతడికి నోటీసులు అందాయి. మేం ఆయన నియామకాన్ని క్లియర్‌ చేశాం. మాకు వివాదమేమీ కనిపించలేదు. అంబుడ్స్‌మన్‌ ఏమైనా గుర్తిస్తే మాకు ఎందుకు కనిపించలేదో అప్పుడు వివరిస్తాం. ఆ తర్వాత జైన్‌ దానిని పరిగణనలోకి తీసుకుంటారు. ఇదంతా ఓ ప్రక్రియ. ఇదిలా కొనసాగుతుంది’ అని రవి తొగ్డె వెల్లడించారు.

భారత్‌-ఏ, అండర్‌-19 కోచ్‌గా ఉన్న రాహుల్‌ ద్రవిడ్‌ను ఎన్‌సీఏ క్రికెట్‌ హెడ్‌గా నియమించారు. చెన్నై సూపర్‌ కింగ్స్‌ యాజమాని ఎన్‌.శ్రీనివాసన్‌కు చెందిన ఇండియా సిమెంట్స్‌లో ఆయన ఉపాధ్యక్షుడిగా ఉన్నారు. దీంతో ద్రవిడ్‌కు పరస్పర విరుద్ధ ప్రయోజనాల నోటీసులు పంపించారు. భారత క్రికెట్‌లో అత్యంత గౌరవించే అతడికి నోటీసులు ఇవ్వడంతో గంగూలీ సహా ఇతర క్రికెటర్లు భగ్గుమన్నారు.

ఈ రోజు జరిగిన సీఓఏ సమావేశానికి ముందే డీకే జైన్‌కు ద్రవిడ్‌ తన వివరణ పంపించారు. ఐతే ఇండియా సిమెంట్స్‌ ఉద్యోగానికి రాజీనామా చేశారో లేదో తెలియలేదు. క్రికెట్‌ హెడ్‌గా తన పదవీ కాలం ముగిసే వరకు సుదీర్ఘ సెలవు తీసుకున్నారని సమాచారం. క్రికెట్‌ అకాడమీని ద్రవిడ్‌ అంతర్జాతీయ స్థాయిలో తీర్చిదిద్దాలని తొగ్డె ఆశించారు. ఆయన దార్శనికతకు సంపూర్ణ మద్దతు అందిస్తామని వెల్లడించారు.


మరిన్ని

జిల్లా వార్తలు

దేవ‌తార్చ‌న

రుచులు