close

తాజా వార్తలు

Published : 31/10/2020 14:52 IST
Facebook Share Twitter Share WhatsApp Share Telegram Share

నా కష్టాల్ని మరోసారి గుర్తుచేసింది

క్షిణాదిలో మరో అగ్ర కథానాయకుడి చిత్రం నేరుగా ఓటీటీ వేదిక ద్వారా విడుదల కాబోతోంది. అదే... సూర్య హీరోగా నటించిన ‘ఆకాశం నీ హద్దురా!’. సుధ కొంగర దర్శకత్వం వహించిన చిత్రమిది. దీపావళి సందర్భంగా నవంబరు 12న అమెజాన్‌ ప్రైమ్‌ వీడియో ద్వారా చిత్రం విడుదలవుతోంది. ఈ సందర్భంగా కథానాయకుడు సూర్య, దర్శకురాలు సుధ కొంగర ఆన్‌లైన్‌లో విలేకర్లతో ముచ్చటించారు. ఆ విషయాలివీ...
‘‘లాక్‌డౌన్‌కి ముందే విడుదల కావాల్సిన సినిమా.. ‘ఆకాశం నీ హద్దురా’. కరోనా పరిస్థితుల వల్ల సాధ్యం కాలేదు. అయితే ఈ ఆరు నెలల సమయమూ మాకు ఉపయోగపడింది. విజువల్‌ ఎఫెక్ట్స్‌తో చిత్రాన్ని మరింత సహజంగా తీర్చిదిద్దింది మా బృందం. థియేటర్‌ కోసమే తీసిన సినిమా ఇది. ప్రస్తుత పరిస్థితుల నేపథ్యంలో ఓటీటీ ద్వారా ప్రేక్షకుల ముందుకు తీసుకు రావల్సి వస్తోంది. మా దర్శకురాలు సుధ ఈ విషయంలో అసంతృప్తిగానే ఉన్నారు. కానీ నిర్మాతగా, ఈ సినిమాలో భాగమైన ప్రతి ఒక్కరి కోసం ఓటీటీలో విడుదల చేయాలనే నిర్ణయం తీసుకున్నా. ఈ మాధ్యమం ద్వారా ఎక్కువమంది ప్రేక్షకులకు సినిమా చేరువ కానుండడం సంతోషంగా ఉంది. థియేటర్‌ అనుభూతిని కోల్పోయినా, కుటుంబమంతా కలిసి హాయిగా ఇంట్లో సినిమాని ఆస్వాదించే   వీలుకలుగుతుంది’’.
* ‘‘ఇది చాలా ప్రత్యేకమైన సినిమా. ఒక సాధారణ మనిషి, అసాధారణమైన కలల్ని కని సాకారం చేసుకున్న విధానం ఇందులో కనిపిస్తుంది. మనందరం తక్కువ ఖర్చుతో విమానయానం చేస్తున్నామంటే కారణం కెప్టెన్‌ గోపీనాథ్‌. ఎయిర్‌ డెక్కన్‌ అధినేత అయిన ఆయన ఒక స్కూల్‌ మాస్టర్‌ అబ్బాయి. ఒక ఎయిర్‌లైన్స్‌ కంపెనీని స్థాపించిన ఆయన కథే ఈ చిత్రం. ఎంతో మందికి స్ఫూర్తిగా నిలిచే కెప్టెన్‌ గోపీనాథ్‌ జీవితం ఆధారంగా సినిమా అన్నప్పుడు ఎలాంటి సందేహాలు కలగలేదు. అయితే విస్తృతమైన ఆయన జీవిత ప్రయాణంలో ఏ భాగం ఈ సినిమాలో ఉంటుందో తెలుసుకోవాలనుకున్నా. సుధ కొంగర స్క్రిప్టు వినిపించాక ఇంకా సంతృప్తి కలిగింది. సెట్స్‌పైకి వెళ్లడానికి కొన్ని నెలల ముందే ఈ చిత్రం కోసం స్క్రిప్ట్‌ పఠనం చేశాం.  ఇది నాకు కొత్త రకమైన అనుభవం. సుధ ఆలోచనలకి తగ్గట్టుగా ప్రయాణం చేశాం’’.

*   ‘‘దర్శకురాలు సుధ నాకు ఎప్పట్నుంచో పరిచయం. ‘యువ’ సినిమా చేసేటప్పుడు ఆమె సహాయ దర్శకురాలు. ఒక సన్నివేశంలో నేను బాగా నటించలేదని మొహం మీదే చెప్పేసింది. దర్శకుడు మణి రత్నంకి నచ్చినా, నాతో మళ్లీ చేయించింది. అలా ఆ సినిమా సమయంలో చాలా విషయాల్లో సహాయం చేసింది. ఈ సినిమా విషయంలోనూ ఆమె ఒక డ్రిల్‌ మాస్టర్‌ని గుర్తు చేశారు. ఏ విషయంలోనూ రాజీ పడకుండా పని చేయించారు. వాస్తవికత ఉట్టిపడేలా ఆమె ఈ చిత్రాన్ని తీర్చిదిద్దిన విధానం చాలా బాగుంది’’.
* ‘‘గజిని’, ‘సూర్య సన్‌ ఆఫ్‌ కృష్ణన్‌’, ‘సింగం’... ఇలా పలు సినిమాల్లో చాలా రకమైన గెటప్పుల్లో కనిపించా. ఇందులో నటించడం మాత్రం భిన్నమైన అనుభవాన్నిచ్చింది. నిజజీవితంలో చేసిన పనుల్ని అదే రీతిలో తెరపై కనిపించేలా నటించాల్సి వచ్చింది. కెప్టెన్‌ గోపీనాథ్‌ ప్రయాణంలోని లోతుల్ని ఆవిష్కరిస్తూ సాగే కథ ఇది. ఆయన్ని నేను బెంగళూరులోని నివాసంలో కలిసి మాట్లాడా. వ్యక్తిగతంగానూ ఈ సినిమా నన్ను నా పాతరోజుల్లోకి తీసుకెళ్లింది. సొంత ఆదాయం కోసం కష్టపడిన రోజుల్ని మరోసారి గుర్తు చేసింది. ఒక సగటు వ్యక్తిగా, ఎయిర్‌ ఫోర్స్‌ కెప్టెన్‌గా, ఎయిర్‌లైన్స్‌ అధినేతగా ఇలా పలు కోణాల్లో సాగే పాత్రలో కనిపించనున్నా. ఈ కథ విన్నప్పుడు నన్ను ఆసక్తికి గురిచేసిందీ నా పాత్ర స్వభావమే. మోహన్‌బాబు సర్‌ ఈ సినిమాకి పెద్ద బలం. తన సన్నివేశాలు, తమిళ యాస విషయంలోనూ ఆసక్తిగా అడిగి తెలుసుకునేవారు. ఆయన పాత్ర గుర్తుండిపోతుంది’’.


అదే అజెండాతోనే తీశా

సుధ కొంగర

‘‘ఈ సినిమా ఆలోచన వచ్చినప్పుడు నా మనసులో ఉన్న ఒకే ఒక్క నటుడు సూర్య. నటుడిగానే కాకుండా, నిర్మాతగానూ ఈ సినిమాకి ఆయన జీవితాన్నిచ్చారు. నిజంగా మా అందరికీ ఎంతో ప్రత్యేకమైన చిత్రం. ఒక సాధారణ మనిషి చేసిన అసాధారణమైన పనుల చుట్టూ తిరిగే ఈ కథ స్ఫూర్తిని నింపుతుంది. ఈ కథలో హీరో తను అనుకున్నది సాధించడానికి పడిన కష్టాల్ని చూసి ఎంతో కొంత నేర్చుకోవచ్చు. ఇదే అజెండాతోనే నేనీ సినిమాని తెరకెక్కించా. స్వతహాగా నాకు ఇలాంటి అండర్‌ డాగ్‌ కథలంటే ఇష్టం. ఓటీటీల ప్రభావం మరో పదేళ్ల తర్వాత బలంగా ఉంటుందని అనుకున్నా. కరోనా విపత్తుతో ఈ వేదికలు మరింత ముందుకు వచ్చాయి. థియేటర్లు ప్రారంభమయ్యాక ప్రేక్షకులు ఈ రెండు మాధ్యమాల్లో సినిమాల్ని ఆస్వాదిస్తారు’’.


Tags :

రాజకీయం

జనరల్‌

సినిమా

క్రైమ్

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు

చిత్ర వార్తలు

సినిమా
మరిన్ని

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.