‘క్రాక్‌’తో విజయాన్ని సొంతం చేసుకున్న రవితేజ ప్రస్తుతం ‘ఖిలాడీ’తో బిజీగా   గడుపుతున్నారు. రమేష్‌ వర్మ దర్శకత్వం వహిస్తున్న ఈ చిత్రంలో రవితేజ ద్విపాత్రాభినయం చేస్తున్నారు. మీనాక్షి చౌదరి, డింపుల్‌ హయతి కథానాయికలు. సత్యనారాయణ కోనేరు నిర్మాత. జయంతీలాల్‌ గడ సమర్పిస్తున్నారు. మంగళవారం రవితేజ పుట్టినరోజు. ఈ సందర్భంగా ‘ఖిలాడీ’ ప్రచార చిత్రాన్ని విడుదల చేశారు. అందులో రవితేజ స్టైలిష్‌ లుక్‌లో కనిపించాడు. ‘‘యాక్షన్‌ ప్రధానంగా సాగే చిత్రమిది. ప్లే స్మార్ట్‌... అనేది ఉపశీర్షిక. ఆద్యంతం ఉత్కంఠగా సాగే ఈ కథలో ఎత్తులు,  పైఎత్తులు ఆకట్టుకునేలా ఉంటాయి. దక్షిణాదిలోని ప్రముఖ ఫైట్‌ మాస్టర్లు రామ్‌- లక్ష్మణ్‌, అన్బు- అరివు ఈ చిత్రానికి పనిచేస్తున్నారు. ఒక మంచి సాంకేతిక బృందం కలిసి, అత్యున్నత సాంకేతిక ప్రమాణాలతో చిత్రాన్ని తీర్చిదిద్దుతోంద’’ని సినీ వర్గాలు తెలిపాయి. మాటలు: శ్రీకాంత్‌ విస్సా, సాగర్‌, సాహిత్యం: శ్రీమణి, కూర్పు: అమర్‌రెడ్డి, ఛాయాగ్రహణం: సుజిత్‌ వాసుదేవ్‌, సంగీతం: దేవిశ్రీప్రసాద్‌.