Cat Garden: పిల్లుల కోసం ఏసీ రూమ్‌లు.. మినీ థియేటర్‌!

తాజా వార్తలు

Published : 21/08/2021 01:24 IST

Cat Garden: పిల్లుల కోసం ఏసీ రూమ్‌లు.. మినీ థియేటర్‌!

ఇంటర్నెట్‌ డెస్క్‌: పెంపుడు జంతువులను కొందరు ఎంతో ప్రేమగా పెంచుకుంటారు. వాటికోసం ఎంతైనా ఖర్చు చేస్తుంటారు. సరైన ఆహారాన్ని ఇస్తూ వాటి ఆరోగ్యం పట్ల శ్రద్ధ తీసుకుంటారు. ప్రత్యేక గూడును ఏర్పాటు చేసి వాటిని ఎల్లప్పుడు పర్యవేక్షిస్తుంటారు. అయితే గుజరాత్‌కు చెందిన ఓ వ్యక్తి ఏకంగా 200 పిల్లులను పెంచుతూ అందర్నీ ఆశ్చర్యపరుస్తున్నాడు. ఆయన వాటికోసం ప్రత్యేకంగా ఒక ‘క్యాట్‌ గార్డెన్‌’ను ఏర్పాటు చేశాడు. వాటి బాగోగులను చూడటానికి తన సంపాదనలో ప్రతి నెలా 90 శాతం వెచ్చిస్తున్నాడు.

గుజరాత్‌ రాష్ట్రంలోని కచ్‌ జిల్లాలో గాంధీ ధామ్‌కి చెందిన ఉపేంద్ర గోస్వామి కస్టమ్‌ హౌజ్‌ ఏజెంట్‌గా పనిచేస్తున్నాడు. అతని భార్య స్కూల్‌ ప్రిన్సిపల్‌గా బాధ్యతలు నిర్వర్తిస్తున్నారు. వీరి ఇంటి ఆవరణలోని 500 చదరపు గజాల విస్తీర్ణంలో ‘క్యాట్ గార్డెన్‌’ను 2017లో ఏర్పాటు చేశారు. అందులో 200 పిల్లులను పెంచుతున్నారు. ఈ క్యాట్‌గార్డెన్‌ నిర్వహణకు నెలకు రూ.1.5 లక్షల వరకు వెచ్చిస్తున్నారు.

తన సోదరి గుర్తుగానే..

‘ఏటా నా సోదరి బర్త్‌డేను ఘనంగా నిర్వహించే వాళ్లం. అలా ఒకసారి పుట్టిన రోజు వేడుకలకు తీసుకొచ్చిన కేకును ఓ పిల్లి పూర్తిగా తీనేసింది. అప్పటినుంచి అది మాతోనే ఉండిపోయింది. 1994లో ఆమె మరణించింది. ఆ తర్వాత పెంచుకుంటున్న పిల్లిలోనే మా సోదరిని చూసుకుంటున్నాం. కొద్ది రోజులు గడిచాక ఆ పిల్లి కొన్నింటికి జన్మనిచ్చింది. అలా పుట్టిన వాటిని జాగ్రత్తగా పెంచుతూ వాటికోసం 2017లో క్యాట్‌ గార్డెన్‌ను ఏర్పాటు చేశాను. ఇదంతా నా సోదరి గుర్తుగానే చేస్తున్నాను’ అని గోస్వామి తెలిపారు.

క్యాట్‌గార్డెన్‌లో ఏమున్నాయంటే..?

గోస్వామి పిల్లుల సౌకర్యార్థం కొన్ని ప్రత్యేక ఏర్పాట్లు చేశాడు. క్యాట్‌గార్డెన్‌లో 12 బెడ్లతో కూడిన 16 కాటేజీలున్నాయి. చల్లదనం కోసం నాలుగు ఏసీ రూమ్‌లుంటాయి. వాటి స్నానానికి షవర్‌ కూడా ఉంటుంది. అంతేకాకుండా వీడియోలు చూపించడానికి ఒక మినీ థియేటర్‌ ఉంది. ఇందులో రోజూ సాయంత్రం కొన్ని జంతువుల వీడియోలను వాటికి చూపిస్తారు. రోజుకి మూడు సార్లు బ్రాండెడ్‌ ఆహారాన్ని అందిస్తారు. అలాగే వాటిని తరచూ మెడికల్‌ చెకప్‌లకు తీసుకెళ్తారు. దీనికి అహ్మదాబాద్‌లోని జివ్‌ దయా ఛారిటబుల్‌ ట్రస్ట్‌ సహాయం అందిస్తోంది. ప్రతి ఆదివారం నాలుగు గంటలు సందర్శకుల కోసం ఈ పిల్లులను బయటికి రప్పిస్తారు. కనీస ప్రవేశ రుసుము కట్టి వీటిని సందర్శించవచ్చు.



Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జాతీయ- అంతర్జాతీయ
మరిన్ని