బతుకు ఆటలో గెలిచాడు !

చిచ్చర పిడుగులు

బతుకు ఆటలో గెలిచాడు !

ఎనిమిదేళ్ల పిల్లాడు... ప్రాణం తీసే వ్యాధితో పోరాడాడు... భయంకరమైన క్యాన్సర్‌ని ఓడించాడు... అంతేనా? ఇప్పుడు మళ్లీ గెలిచాడు... ప్రపంచ పోటీల్లో బంగారుపతకం తెచ్చుకున్నాడు...
ఆ విజేత సంగతులేంటో చదివేద్దామా!
చాలా రోజులు క్యాన్సర్‌ వ్యాధితో బాధపడ్డాడు. అయినా బెదరలేదు. ఎన్నో రోజులు వైద్యం చేయించుకుంటూనే ఉన్నాడు. అయినా ఎక్కడా ఆత్మవిశ్వాసం కోల్పోలేదు. ధైర్యంగా ముందుకు నడిచాడు. మామూలు పిల్లల్లాగే పోటీలకు సిద్ధమై గెలుపు దక్కించుకున్నాడు.
* ఆ అబ్బాయి ఎవరో కాదు కోల్‌కతాకు చెందిన ఎనిమిదేళ్ల పిల్లాడు. పేరు ఆరోన్‌యతీష్‌.
* మొన్నీమధ్య మాస్కోలో జరిగిన వరల్డ్‌ చిల్డ్రన్స్‌ విన్నర్స్‌ గేమ్స్‌లో టేబుల్‌ టెన్నిస్‌లో మొదటి బహుమతి అందుకున్నాడు. దేశదేశాల నుంచి ఎంతోమంది పిల్లలు ఈ ఆటల్లో పాల్గొంటే మనదేశం నుంచి 10 మంది పిల్లలు వెళ్లారు.
* ఇంతకీ ఈ పోటీలేంటీ అంటే... వరల్డ్‌ చిల్డ్రన్స్‌ విన్నర్స్‌ గేమ్స్‌ పేరిట 2010 నుంచి ఏటా రష్యాకు చెందిన గ్రాంట్‌ ఆఫ్‌ లైఫ్‌ అనే ఫౌండేషన్‌ ఈ పోటీల్ని నిర్వహిస్తోంది. క్యాన్సర్‌తో పోరాడి గెలిచిన పిల్లల కోసమే ప్రత్యేకంగా ఏర్పాటు చేసిన ఈ ఆటల్లో ప్రపంచదేశాల పిల్లలు పాల్గొంటారు. చిన్నారుల్లో ఆత్మవిశ్వాసం పెంచడానికి, తామూ అందరి పిల్లల్లాంటి వారిమే అనే భావన పెంచాలనే ఉద్దేశంతో వీటిని పెట్టారు. ఏడు నుంచి పదహారేళ్ల చిన్నారుల కోసం వయసును బట్టి స్విమ్మింగ్‌, టేబుల్‌ టెన్నిస్‌, షూటింగ్‌, చెస్‌, ఫుట్‌బాల్‌ ఇలా బోలెడు ఆటల్ని ఆడించారు.
* ఆరోన్‌కి ఈ బహుమతి తేలిగ్గా ఏం రాలేదు. దీనికోసం ఎంతో శ్రమించాడు. ఈ అబ్బాయికి చిన్నప్పటి నుంచీ ఆటలంటే చాలా ఇష్టం. కానీ 2016లో క్యాన్సర్‌ వచ్చిందని తెలిసింది. దీంతో రెండేళ్లపాటు వైద్యం చేయించుకుంటూ ఆసుపత్రుల్లోనే ఉండాల్సి వచ్చేది. వ్యాధి తగ్గిందని తెలిశాక మళ్లీ ఆటలపై దృష్టిపెట్టాడు. రోజూ పొద్దున్నే 5 గంటలకు లేచి షూటింగ్‌, టేబుల్‌ టెన్నిస్‌ సాధన చేసేవాడు. అలా తనకిష్టమైన ఆటల్లో పట్టు సాధించాడు.

అటు జీవితంలో ఇటు ఆటలో విజేతగా నిలిచిన ఈ నేస్తం మనకు ఆదర్శమే కదూ!

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు