close

పొలమే ప్రయోగశాల 

పరిశోధన ఫలాన్ని రైతులకు క్షేత్రంలో ప్రత్యక్షంగా చూపాలి 
  అప్పుడే దాన్ని అందిపుచ్చుకుంటారు 
  శాస్త్రవేత్తల్లో క్రమశిక్షణ, పని సంస్కృతి పెరిగితే సత్ఫలితాలు 
  నగరాలు, పట్టణాలకు సమీపంలో వరి సాగు చేయనివ్వకూడదు 
  శివార్లలో పండ్లు, కూరగాయలే పండించాలి 
  తృణధాన్యాల సాగు పెరిగితే ప్రజలకు పోషకాహారం 
‘ఈనాడు’తో ముఖాముఖిలో ఫ్లోరిడా విశ్వవిద్యాలయ శాస్త్రవేత్త కె.రమేశ్‌రెడ్డి 
ఈనాడు - హైదరాబాద్‌

‘మనదేశంలో వరి అన్నం తినేవారి సంఖ్య చాలా ఎక్కువ. ఇది ఎందుకు తినాలని ఆలోచించడం మొదలుపెడితే వరి సాగును సులభంగా తగ్గించవచ్చు. అధిక నీటి వినియోగం అవసరమయ్యే వరి పంటను నగరాలు, పట్టణాల సమీపంలో సాగు చేయనివ్వకూడదు. అక్కడి ప్రజలకు నిత్యావసరాలైన పండ్లు, కూరగాయలను వరికన్నా చాలా తక్కువ నీటితో పండించవచ్చు’ అని ప్రముఖ వ్యవసాయ శాస్త్రవేత్త కె.రమేశ్‌రెడ్డి చెప్పారు. అమెరికాలోని ఫ్లోరిడా విశ్వవిద్యాలయంలో గత 40 ఏళ్లుగా శాస్త్రవేత్తగా పనిచేస్తున్న ఆయన హైదరాబాద్‌లోని ప్రొఫెసర్‌ జయశంకర్‌ వ్యవసాయ వర్శిటీకి వచ్చిన సందర్భంగా ‘ఈనాడు’తో ప్రత్యేకంగా మాట్లాడారు. ముఖాముఖి సారాంశమిదీ..

దీర్ఘకాలంగా అమెరికా వర్శిటీల్లో వ్యవసాయ పరిశోధనల్లో ఉన్నారు. అక్కడికి, మనదేశంలో సాగుకు స్పష్టమైన తేడా ఏమిటి? 
మనకు ఏం కావాలో తెలిస్తే మన రైతులు ఏం పండించాలనేదీ అర్థమవుతుంది. మన ఆలోచనా విధానం మారాలి. నేను గత 30 ఏళ్లుగా వరి అన్నం తినడం లేదు. అయినా 7 పదుల వయసు దాటినా ఇప్పటికీ రోజూ 5 మైళ్లు నడుస్తున్నా. ఆరోగ్యంగానే ఉన్నా. పోషకాహారం తినాలనే ధ్యాస అందరిలోనూ పెరిగితే మనం సాగు చేసే పంటల విషయంలో పూర్తిగా మార్పులు వస్తాయి. వరి అన్నంకన్నా తృణధాన్యాల పంటలు తినడం అలవాటైతే మరిన్ని పోషకాలు ప్రజలకు అందుతాయి.

భారత్‌లో పేదరికం, చిన్న కమతాలను దృష్టిలో పెట్టుకుని చూస్తే.. పంటల సాగులో ఎలాంటి మార్పులు తేవాలి? 
పంటల కాలనీలు ఏర్పడాలి. ఒక ప్రాంత వాతావరణానికి అనుకూలం, డిమాండు ఉన్న పంట అక్కడ పండించాలి. ఉదాహరణకు హైదరాబాద్‌, విజయవాడ, విశాఖపట్నం, తిరుపతి వంటి నగరాలకు దగ్గరలో వరి సాగు ఎందుకు చేయనిస్తున్నారో చెప్పండి. నగరాలకు ప్రతిరోజూ పండ్లు, కూరగాయలు, సుగంధ ద్రవ్యాలు చాలా అవసరం. వాటిని వరికన్నా తక్కువ నీటితో పట్టణాలకు సమీపంలో పండించే విధానం రావాలి. ఇలా చేయడానికి కమతాలు, పేదరికం వంటివి అడ్డుకావని నా ఉద్దేశం.

ఇక్కడ వ్యవసాయ పరిశోధనల ఫలితాలు రైతులకు సులభంగా ఎందుకు అందడం లేదు? 
వ్యవసాయ శాస్త్రవేత్తల్లో క్రమశిక్షణ, పని సంస్కృతి పెరిగితే సత్ఫలితాలు కనిపిస్తాయి. ప్రయోగశాలలో ఏం సాధించారనేది రైతుల పొలాల్లో నేరుగా చేసి, ఫలితాలను ప్రత్యక్షంగా చూపాలి. అప్పుడు రైతులు వాటిని అందిపుచ్చుకుంటారు. శాస్త్రవేత్తలు రైతులతో కలసి పనిచేస్తే పరిజ్ఞానాన్ని వారే చూసి తెలుసుకుంటారు. అమెరికాలో అదే జరుగుతోంది. ప్రదర్శనా క్షేత్రాల్లో ప్రయోగాలను ప్రత్యక్షంగా చేసి చూపుతారు. వ్యవసాయ పరిశోధనల ఫలితాలను రైతులకు చేరవేసేందుకు విస్తరణ విభాగం పటిష్ఠంగా పనిచేయాలి.

మీరు ఏ రంగంలో పరిశోధనలు చేస్తున్నారు? రైతులకు ఎలా అందిస్తున్నారు ? 
ఫ్లోరిడా వర్శిటీలో భూసార, నీటి పరిరక్షణ విభాగం ఛైర్మన్‌గా పనిచేస్తున్నా. మెట్టభూముల్లో సాగుపై పరిశోధనలు చేశాను. భూసారాన్ని రక్షించుకుని, నీటిని పొదుపుగా వాడుకుంటే పంటల దిగుబడి ఎలా పెంచవచ్చనేది అక్కడి రైతులకు మా పరిశోధనల ద్వారా నేరుగా వివరిస్తుంటాం.

చిన్న కమతాల రైతుల ఆదాయం ఎలా పెంచాలి? 
చిన్న రైతులను సంఘటిత సాగు వైపు ప్రోత్సహించాలి. ఎక్కువ ధరకు అమ్ముకునే వ్యవస్థ ఏర్పాటుకావాలి. ఒక్కో రైతు విడివిడిగా చేసే సాగుకన్నా సంఘంగా పెద్ద కమతం మాదిరిగా ఒకే పంటను పండిస్తే అనేక లాభాలున్నాయి.

అమెరికాలో నీటి పరిరక్షణకు ఎలాంటి చర్యలు తీసుకుంటారు ? 
అక్కడ చెరువుల పరిరక్షణ, నీటి పరిశుభ్రతకు అత్యంత ప్రాధాన్యముంటుంది. ఓర్లాండో ప్రాంతంలో ఒక చెరువు ఉంది. దాని చుట్టుపక్కల 40 వేల ఎకరాల్లో క్యాబేజీ, క్యారెట్‌ వంటి పంటలు పండించేవారు, ఆ పంటల సాగు తరవాత వ్యర్థాలు, మురుగునీరంతా చెరువులోకి వస్తున్నందున అది కలుషితమవుతోందని పరిశోధనల్లో గుర్తించాం. ప్రభుత్వం వెంటనేరంగంలోకి దిగి, 10 కోట్ల డాలర్లను పరిహారంగా చెల్లించి ఆ భూమిని కొనేసింది. అక్కడ చెట్లు పెంచి చెరువులోకి మురుగు నీరు చేరకుండా గట్టి చర్యలు తీసుకుంది. సహజ వనరులు కలుషితం కాకుండా ఇంత తీవ్రమైన చర్యలుంటాయి.

నదీ పరీవాహక ప్రాంతాల్లో అలా చేయడం సాధ్యమేనా? 
నదుల నీటి నమూనాలనూ పరీక్షించి వాటి శుభ్రతకు ప్రాధాన్యమివ్వాలి. హైదరాబాద్‌లో మూసీ నది చాలా తీవ్రంగా కలుషితమైంది. అలాంటి నీటితో పంటల సాగు ఎందుకని అందరూ ఆలోచించాలి. నీటి నాణ్యత సరిగా లేకపోతే నాణ్యమైన పంటలు పండవని మా పరిశోధనల్లో గుర్తించాం. నీటి నమూనాలనూ ఎప్పటికప్పుడు పరీక్షించి పంటల సాగుకు అవి పనికొస్తాయో లేదో రైతులకు చెప్పాలి.

అమెరికాలోనూ రసాయన ఎరువులు, పురుగుమందులు ఎక్కువగా వాడుతున్నారు. వీటి వాడకంతో భూసార పరిరక్షణ ఎలా సాధ్యం? 
అక్కడ వేల ఎకరాల్లో సగటు దిగుబడి ఎక్కువ. ఆ నిష్పత్తితో పోలిస్తే ఇక్కడ చిన్న కమతాల్లో తక్కువ దిగుబడికి వాడే రసాయనాలు అధికం. మనం ఆరోగ్యాన్ని ఎంత జాగ్రత్తగా చూసుకుంటామో, నేలతల్లినీ అలాగే కాపాడుకోవాలి. భూసారంలో కర్బన పదార్థం (ఆర్గానిక్‌ మేటర్‌) చాలా ముఖ్యం. అది తగ్గితే భూమి నిస్సారమై పంటలు పండవు. దాన్ని కాపాడుకోవడానికి అమెరికా శాస్త్రవేత్తలు, రైతులు ఎక్కువ శ్రద్ధ చూపుతారు. ఏయే పోషకాలు తక్కువుంటే వాటిని సులభంగా అందించే సేంద్రియ ఎరువులు వాడితే భూసారం పెరుగుతుంది.

వ్యవసాయ శాస్త్రవేత్తగా ఇక్కడా, అమెరికాలో పనిచేశారు, పని విధానంలో మీరు గమనించిన తేడా ఏమిటి? 
అమెరికాలోని 3 పెద్ద వర్శిటీల్లో నేను మొత్తం 45 ఏళ్లుగా పనిచేస్తున్నా. అక్కడ ప్రతి ఏడాదీ నేనేం చేస్తున్నానో నిరూపించుకోవాలి. ఈ ఏడాది నేను మంచి ఫలితాలు చూపకపోతే.. వచ్చే ఏడాది సక్రమంగా పనిచేయాలని హెచ్చరిస్తారు. అప్పుడూ ఫలితాలు రాకపోతే ఉద్యోగం ఉండదు. ఇక్కడా అలాంటి పనివిధానం రావాలి. ప్రతి ఒక్కరూ తానేం చేయాలనుకుంటున్నాను, దాని వల్ల ఏం ఫలితాలు రైతులకు అందుతాయనే కోణంలో అంకితభావంతో పనిచేస్తేనే వ్యవసాయ రంగానికి మేలు జరుగుతుంది. అక్కడ ఒక వర్శిటీలో చదివి, పీహెచ్‌డీలు తీసుకున్నవారికి అక్కడే ఉద్యోగం ఇవ్వడానికి ఇష్టపడరు. బయటివారిని తీసుకోవడానికి ప్రాధాన్యమిస్తారు. ఇతర ప్రాంతాల వారిలో కొత్త ఆలోచనలు ఉంటాయనేది వ్యూహం. మనదేశంలో ఒకే వర్శిటీలో డిగ్రీలన్నీ చదివి, అక్కడే ఉద్యోగం, ప్రమోషన్లు పొంది, అక్కడే రిటైర్‌ కావాలనుకుంటారు. 


కుగ్రామం నుంచి అగ్రదేశానికి..

తెలంగాణ రాష్ట్రంలోని ఓ కుగ్రామానికి చెందిన కె.రమేశ్‌రెడ్డి.. అగ్రదేశంలో కీలక పదవుల్లో పనిచేసే స్థాయికి ఎదిగారు. ఆయనది మేడ్చల్‌ జిల్లా శామీర్‌పేట మండలం తూంకుంట గ్రామం. తిరుపతి వ్యవసాయ కాలేజీలో ఏజీ బీఎస్సీ, హైదరాబాద్‌లోని ఒకప్పటి ఆచార్య ఎన్జీరంగా వ్యవసాయ వర్శిటీలో 1967లో అగ్రికల్చరల్‌ ఎంఎస్సీ పూర్తిచేశారు. ఆ తరువాత అక్కడే వ్యవసాయ అధ్యాపకుడిగా మూడేళ్లు పనిచేశారు. 1971-76 మధ్యకాలంలో అమెరికాలోని లూసియానా వర్శిటీలో రిసెర్చ్‌ అసోసియేట్‌గా చేరి వ్యవసాయంలో పీహెచ్‌డీ చేశారు. 1976-79లో నార్త్‌ కరోలినా వర్శిటీలో పోస్ట్‌ డాక్టోరల్‌ రిసెర్చ్‌ అసోసియేట్‌గా పనిచేశారు. 1979లో ఫ్లోరిడా వర్శిటీలో సహాయ శాస్త్రవేత్తగా చేరి.. ప్రస్తుతం అక్కడే భూసార, నీటి శాస్త్ర విభాగం ఛైర్మన్‌గా పనిచేస్తున్నారు. పలు అంశాల్లో పురస్కారాలు అందుకున్నారు. గతేడాది మెట్టభూముల బయోకెమిస్ట్రీ విభాగంలో జీవిత కాల సాఫల్య గోల్డెన్‌ కట్టైల్‌ పురస్కారం, 2016లో అమెరికా జాతీయ మెట్టభూముల పరిశోధనా పురస్కారం అందుకున్నారు.

 

ముఖ్యాంశాలు

జిల్లా వార్తలు

దేవతార్చన

రుచులు

© 1999 - 2019 Ushodaya Enterprises Pvt.Ltd,All rights reserved.
Powered By Margadarsi Computers
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions | Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.