మనం ఎవరం?

ఒకసారి దేవతలు, రాక్షసులు, మనుషులూ కలిసి విందు ఏర్పాటు చేసుకున్నారు. రుచికరమైన ఆహారపదార్థాలు బంగారు విస్తళ్లలో ఉన్నాయి. తినబోతే చేతులు కదల్లేదు. కొయ్యతెడ్లలాగా మోచేతుల దగ్గర బిగుసుకుపోయి వంగటం లేదు. ఆహారం నోట్లో పెట్టుకోవటం వీలవలేదు. పదార్థాలు నోరూరిస్తోంటే పోనీ ఎడమ చేతితో తిందామనుకుంటే అదీ వంగ లేదు.
రాక్షసులు రకరకాలుగా ప్రయత్నించి, చివరికి జంతువుల్లాగా బోర్లా పడుకుని విస్తరిలోకి వంగి నేరుగా నోటితో తినటం మొదలుపెట్టారు.
మనుషులు తామెలా తినాలా అని ఆలోచించారు. చెయ్యి వంగటం లేదు కానీ కర్ర లాగా ముందుకు చాపవచ్చు. అందుకని ఎదుటివారి నోటికి అందించి చూశారు. కుదిరింది. దానితో ఒకరికొకరు తినిపించుకుంటూ తృప్తిగా తిన్నారు.
ఎదుటివారి నోళ్లలో పెడుతున్న మనుషుల్ని చూసి దేవతలు తమ విస్తళ్లలో ఉన్న పదార్థాలను కూడా తీసుకోమన్నారు. ఆయా జాతుల తత్త్వం ఈ ఒక్క సంఘటనతో అర్థమవుతుంది. ఈ మూడు రకాలవారూ ఇప్పుడు కూడా ఉన్నారు.
స్వార్థంతో అంతా తమకే కావాలనుకుని ఏదో విధంగా అనుభవించాలనుకునే వారిది రాక్షసజాతి. ఒకరికొకరు సహకరించుకునే వారు మనుషులు. తమకి లేకున్నా ఇతరులకి ఇచ్చేవారు దేవతలు. మనం ఏ జాతికి చెందినవాళ్లమో ఆలోచించుకోవాలి! ఇంకో విశేషం ఏమంటే మనుషులు ఒకరికొకరు నిస్వార్థంగా సహాయం చేసుకుంటే బలహీనతలు, అంగవైకల్యాలు కూడా అవరోధాలు కావు. దేవతలు అడగకుండానే సహకారం అందిస్తారు.

- తుషార్‌

• Self Examining
• Doubt
• God
• Evil
• Belief