ఆ రెండక్షరాలే తారకమంత్రం!

వాల్మీకి రామాయణంలోని శ్లోకాల సంఖ్య ఇరవై నాలుగు వేలు. అయితే పరమశివుడి వద్ద వంద కోట్ల శ్లోకాలున్న రామాయణం ఉండేది. శివుడు ఆ వంద కోట్ల శ్లోకాలనూ దేవతలు, రాక్షసులు, రుషులకు సమానంగా పంచగా.. ఒక శ్లోకం మిగిలింది. ఒక్కొక్కరికీ పది అక్షరాల చొప్పున ఆ శ్లోకాన్ని కూడా పంచగా.. అందులో ఇంకా రెండు అక్షరాలు మిగిలిపోయాయి.అది చూసిన దేవతలు ‘పరమేశ్వరా! మిగిలిపోయిన ఆ రెండక్షరాలను ఎలా పంచుతారు? ఇక్కడ మేం మూడు జట్లుగా ఉన్నాం కదా’ అని సందేహం వెలిబుచ్చారు. ఈసారి పరమేశ్వరుడు చిరునవ్వు చిందించాడే తప్ప, వారి ప్రశ్నకు బదులు చెప్పలేదు. దేవతలు మళ్లీ అడిగారు. అప్పుడు మహేశ్వరుడు చిద్విలాసంగా నవ్వి.. ‘వాటిని మాత్రం నేనెవ్వరికీ ఇవ్వను. నా దగ్గరే ఉంచు కుంటాను’ అన్నాడు. ‘ఇంతకీ ఆ రెండక్షరాలు ఏవో తెలియజేయండి స్వామీ’ అని అర్థించారు దేవతలు. మహాశివుడు తల పంకించి.. ‘అవి మరేవో కాదు.. రా.. మ.. అనే రెండక్షరాలు. ఆ రెండూ చాలా దివ్యమైనవి. ఒక్క మాటలో చెప్పాలంటే ఆ రెండూ కలిస్తే.. తారకమంత్రం’ అంటూ తెలియజేశాడు.

 సాయి అనఘ