చిట్టి చెవులు భద్రం!

చెవి ఇన్‌ఫెక్షన్లు ఏ వయసులోనైనా రావొచ్చు. కానీ పిల్లల్లో ఎక్కువ. మూడేళ్ల వయసు వచ్చేసరికి ప్రతి ఆరుగురిలో ఐదు మంది కనీసం ఒక సారైనా చెవి ఇన్‌ఫెక్షన్‌కు గురవుతుంటారని అంచనా. దీనికి చాలావరకు బ్యాక్టీరియానే కారణం. కొన్నిసార్లు వైరస్‌తోనూ రావొచ్చు. సాధారణంగా గొంతునొప్పి, జలుబు, ఫ్లూ, ఇతర శ్వాసకోశ ఇన్‌ఫెక్షన్ల అనంతరం కర్ణభేరి వెనకాల ద్రవం పోగుపడటం, ఉబ్బుతో చెవి ఇన్‌ఫెక్షన్‌ మొదలవుతుంటుంది. ఫలితంగా చెవి నొప్పి, జ్వరం, చిరాకు, ఏడుపు, నిద్ర పోకపోవటం వంటివి ఇబ్బంది పెడతాయి. దీన్ని నిర్లక్ష్యం చేయొద్దు. వెంటనే డాక్టర్‌ను సంప్రదించాలి. ఓటోస్కోప్‌ సాయంతో కర్ణభేరిని చూసి చెవి ఇన్‌ఫెక్షన్‌ను నిర్ధారిస్తారు. చెవిలోకి గాలిని పంప్‌ చేసి కర్ణభేరి వెనకాల ద్రవం ఉందో లేదో తెలుసుకుంటారు. బ్యాక్టీరియా ఇన్‌ఫెక్షన్‌ అయితే యాంటీబయాటిక్స్‌తో నయమైపోతుంది. నొప్పి, జ్వరం తగ్గటానికి పారాసిటమాల్‌ మాత్రలు, చుక్కల మందు సూచిస్తారు. చెవి ఇన్‌ఫెక్షన్‌ వచ్చాక బాధపడటం కన్నా నివారించుకోవటమే మంచిది. ఇందుకు ఉత్తమమైన మార్గం పిల్లలను జలుబు, ఫ్లూ బారినపడకుండా చూసుకోవటం. కుటుంబ సభ్యులంతా తరచూ చేతులను శుభ్రంగా కడుక్కుంటే సూక్ష్మక్రిములు వ్యాపించకుండా కాపాడుకోవచ్చు. ఏటా పిల్లలకు ఫ్లూ టీకా ఇప్పించాలి. జలుబు, ఫ్లూ లక్షణాలు గల పిల్లలతో కలిసి ఆడుకోకుండా చూసుకోవాలి.