ఇలా కూడా చేస్తారు!

షర్బత్‌ చేయాలంటే నిమ్మకాయలను సగానికి కోసి రసం తీసి, పంచదార వేస్తాం. రసం తీసేటప్పుడు నిమ్మచెక్కల లోంచి చేదు దిగకుండా జాగ్రత్తపడతాం. ఇది మనందరికీ తెలిసిన పద్ధతి. కానీ అంతకంటే సునాయాసంగా చేయడం ఎలాగో తెలుసా.. మిక్సీజార్‌లో రెండు గ్లాసుల నీళ్లు, ఆరు చెంచాల పంచదార, రెండు నిమ్మకాయలు యథాతథంగా వేసి గ్రైండ్‌ చేసి వడకడితే చాలు షర్బత్‌ తయారైపోతుంది. కానీ.. చేదుగా ఉండదా అనిపిస్తోంది కదూ! జిహ్వకో రుచి అంటారుగా! కొందరికి అలా నచ్చుతుంది కాబోలు. ప్రముఖ హిందీ నటి నీనా గుప్తా తరచూ ప్రయాణాలు చేస్తుంటారు. ఆసక్తికరమైన విశేషాలు ఏమైనా గమనిస్తే ఇన్‌స్టాగ్రామ్‌లో పోస్ట్‌ చేస్తుంటారు. ఇటీవల కేరళ పర్యటనలో ఒక స్ట్రీట్‌ వెండర్‌ ఇలా షర్బత్‌ తయారుచేయడాన్ని చూసి.. ‘ఇదెంతో సులువు కదా!’ అంటూ నలుగురితో పంచుకున్నారామె. నచ్చితే మీరూ ప్రయత్నించండి.