తింటే చాలు.. సెంటు వాసనే!

దానిమ్మ, ద్రాక్ష, యాపిల్‌, బొప్పాయి.. ఇలా పండ్లలో బోలెడన్ని రకాలున్నాయి. వాటన్నిటికీ భిన్నమైంది పర్‌ఫ్యూమ్‌ ఫ్రూట్‌. సెంటులా పరిమళిస్తుంది కనుక ఆ పేరుతో పిలుస్తున్నారు. వాసన సరే.. రుచి ఎలా ఉంటుందంటారా? అరటిపండు, పైనాపిల్‌, లిచి, నారింజ, మామిడిపండు.. అన్నీ కలబోసినట్లుండి వహ్వా అనిపిస్తుంది. రుచీ, సువాసనా మాత్రమే కాదండోయ్‌.. ఈ పండు తిన్నాక శరీరం కూడా పరిమళభరితం అవుతుంది. ఆఖరికి చెమట, మూత్రం కూడా పర్‌ఫ్యూమ్‌ వాసనే వస్తాయి. అద్భుతమే కదూ! ఇంత ఘనమైంది కనుకనే.. ఒకప్పుడు వీటిని రాజకుటుంబీకులు మాత్రమే తినాలనే ఆంక్ష ఉండేది. సామాన్య ప్రజలు ఈ పండ్లను తినడం కాదు కదా.. పెంచడం కూడా నిషేధమే. మలేషియాలో ప్రసిద్ధమైన ఈ పండ్లను మనమూ తెచ్చుకుందామా! కొన్ని గింజలు పెరట్లో నాటామంటే.. ఇక సెంట్లూ, డియోడరెంట్లతో పనే లేదు.. ఒక్క పండు తింటే చాలు మూడు రోజుల దాకా ఒళ్లంతా పర్‌ఫ్యూమ్‌ రాసుకున్నట్లు ఘుమాయిస్తుంది.