ఇది రాజస్థాన్‌ వాళ్ల పాయసం!

ఇసుక ఎడారులు, అందాల భవనాలు అనగానే రాజస్థాన్‌ గుర్తొస్తుంది కదూ! వాళ్ల వంటకాలు కూడా ఆకట్టుకునేట్టే ఉంటాయి. వాటిల్లో ‘గెహూ కా దూధియా ఖీచ్‌’ మరీ మరీ ప్రత్యేకమైంది. దీనికి ఏమేం కావాలంటే.. అర కప్పు గోధుమరవ్వకు అంతే మొత్తంలో పంచదార, 3 కప్పుల పాలు, చారెడు చొప్పున బాదం పలుకులు, కిస్‌మిస్‌లు, 4 యాలకులు, కొద్దిగా కుంకుమపువ్వు, చెంచా నెయ్యి అవసరమౌతాయి. తయారీ కూడా సులువే. గోధుమరవ్వలో కప్పు నీళ్లు, ఇంకో కప్పు పాలు పోసి సన్న సెగ మీద ఉడికించాలి. మందపాటి గిన్నెలో మిగిలిన రెండు కప్పుల పాలు పోసి.. దంచిన యాలకులు, బాదం పలుకులు, కిస్‌మిస్‌లు, కుంకుమపువ్వు, నెయ్యి, పంచదార వేసి కలియ తిప్పి తక్కువ సెగ మీద సుమారు పది నిమిషాలు తెర్లించాలి. అందులో ఉడికించిన గోధుమరవ్వ వేసి.. ఉండలు కట్టకుండా కలియ తిప్పుతుండాలి. చిక్కబడిన తర్వాత దించేయాలి. అందుకు ఇంకో మూడు నిమిషాలు పడుతుంది. ఈ ‘గెహూ కా దూధియా ఖీచ్‌’లో కాస్త నెయ్యి వేసుకుని వేడిగా తింటే అమృతంలా ఉంటుంది.