నాలుగు రుచుల పండు

పాండనస్‌ టెక్టోరియస్‌ గురించి ఎప్పుడైనా విన్నారా! ఇది తాచ్‌ స్క్రూపైన్‌, తాహితీయన్‌ స్క్రూపైన్‌, హలా పేర్లతోనూ ప్రసిద్ధం. మలేషియా, తూర్పు ఆస్ట్రేలియా, పసిఫిక్‌ దీవులకు చెందిన ఈ చెట్లు 13 నుంచి 26 అడుగుల ఎత్తు వరకూ పెరుగుతాయి. వీటి పండ్లు పసుపు, నారింజ, ఎరుపు, ఆకుపచ్చ రంగుల్లో గుండ్రంగా, కోలగా ఉంటాయి. పక్వానికి వచ్చినప్పుడు మంచి వాసన వస్తాయి. మిగల పండితే మాత్రం ఘాటు వాసనతో వికారం కలిగిస్తాయి. రుచి... పనస, అనాస, మామిడిపండ్లకు చెరుకురసం జత చేసినట్లు ఉంటుంది. గుజ్జును అలాగే తినొచ్చు. లేదంటే పండ్లరసం, జామ్‌ లాంటివి చేసుకోవచ్చు. ఈ చెట్లు సాధారణంగా సముద్ర తీర ప్రాంతాల్లో పెరుగుతాయి. ఒక్కో పండులో 2 - 8 వరకు విత్తనాలుంటాయి. ఈ గింజలు సముద్రంలో రాలి, తేలుతూ చాలా కాలం జీవంతోనే ఉంటాయి.