సొగసుల కాన్వాసులు..

పాత ఫ్యాషన్లకు మెరుగులద్ది.. కొత్త ట్రెండ్‌లను పరుగులు పెట్టించిన కాలమిది. అమ్మాయిలు, అబ్బాయిల ఒంటిని చుట్టేసిన వాటిలో కొన్ని ఇవి..

లేటెక్స్‌: ఒంటిని అతుక్కునేలా ఉండి, స్టైలిష్‌గా కనిపించే లేటెక్స్‌లని దాదాపు బాలీవుడ్‌ తారామణులంతా ఆదరించారు. ఎరుపురంగులో దీపికా పదుకొణె అదరగొడితే నలుపు రంగు లేటెక్స్‌ గౌనులో జాన్వీ ఆకట్టుకుంది.

అథ్లీజర్‌: అథ్లెటిక్‌ ఫ్యాషన్‌, లీజర్‌వేర్‌లను కలిపితే ఈ అథ్లీజర్‌. కళాశాలలు.. పార్టీలకు అబ్బాయిలు వీటిని ఎక్కువగా ఫాలో అయ్యారు.

కార్సెట్‌: కాలేజీ అమ్మాయిలు, సినిమా కాంతలు.. ఈ స్టైల్‌ని బాగా ఒంటబట్టించుకున్నారు. సౌకర్యం, ఆధునికం వీటి ప్రత్యేకం. ‘లైగర్‌’ భామ అనన్య పాండే ఈ ట్రెండ్‌కి బ్రాండ్‌ అంబాసిడర్‌గా నిలిచింది. మన అగ్ర కథానాయిక సమంత సైతం తెలుపు రంగు కార్సెట్‌ వేసి ఇన్‌స్టాలో తళుక్కుమంది.

యాంటీ ఫిట్‌: దుస్తులు ఫిట్‌గా ఉంటేనే స్టైల్‌ హిట్‌ అనే మాటను ఈ ఏడాది పక్కన పెట్టేశారు కుర్రాళ్లు. ‘యాంటీ ఫిట్‌’ అనే ట్రెండ్‌నే అందుక్కారణం. ఓవర్‌సైజ్‌ చొక్కాలు, టాప్‌లను ఆదరించడమే ఈ స్టైల్‌ ఉద్దేశం.

ప్యాంట్‌సూట్‌: ట్రెండ్‌ పాతదే అయినా ఈ ఏడాదిలో పరుగు ఆపలేదు ప్యాంట్‌సూట్లు. కాలేజీ అమ్మాయిలు, కార్పొరేట్‌ ఉద్యోగినులు వీటికి ఎక్కువగా జై కొట్టారు. పసుపు రంగు ప్యాంట్‌సూట్‌ వేసుకొని బాలీవుడ్‌ భామ అలియా భట్‌ ఇన్‌స్టాలో చేసిన సందడికి కుర్రాళ్లు ఫిదా అయిపోయారు.

బౌలింగ్‌ షర్ట్‌లు: బాక్స్‌ కట్‌ ఉండే కురచ స్లీవ్‌ చొక్కాలే బౌలింగ్‌ షర్ట్‌లు. ఇందులో ముదురు వర్ణాల ప్యాటర్న్‌లను అబ్బాయిలు ఎక్కువగా ఇష్టపడ్డారు.

కటౌట్‌: బోరింగ్‌ వస్త్రధారణకు బైబై చెబుతూ.. డేరింగ్‌ స్టైల్‌ మా సొంతం అని నిరూపించుకోవాలి అనుకునే అతివలు ఈ కటౌట్‌లకు ఓటేశారు. వక్ష భాగంలో కట్‌ ఉండటం వీటి ప్రత్యేకత. నలుపు రంగు మిడీ డ్రెస్‌లో కృతి సనన్‌ ఇన్‌స్టాగ్రామ్‌లో అప్పుడెప్పుడో పెట్టిన ఫొటోలు ఇంకా కళ్లముందు మెదులుతున్నాయి అబ్బాయిలకు.

• Telugu News
• Youth Stories
• Fashion