చలిలోనూ సాఫీగా..

బండి లేకుండా కుర్రాళ్లకి రోజు ముందుకెళ్లదు. ఆ బండికేమో ఈ చలికాలం అంటే వణుకు. తరచూ మొరాయిస్తుంది. మరి ప్రయాణం సాఫీగా సాగాలంటే ఏం చేయాలి?

* శీతకాలంలో మనకి స్వెటర్లు, జాకెట్లు ఎంత అవసరమో.. ద్విచక్రవాహనాలకూ కవర్లు అంతే. ముఖ్యంగా వాహనాలు బయట పెట్టినప్పుడు కవర్లతో కప్పి ఉంచాలి. లేదంటే స్టార్టింగ్‌ సమస్యలొస్తాయి. ఇంజిన్‌, ఇతర విభాగాలు.. బిగుసుకుపోతాయి.
* చలికాలంలో టైర్లలో గాలి తగ్గిపోతుంటుంది. పొగమంచు కురుస్తున్న సమయంలో టైర్లు రోడ్డుపై జారిపోతుంటాయి. దూర ప్రయాణాల్లో టైర్‌ ప్రెషర్‌ని తప్పకుండా పరీక్షిస్తుండాలి.
* ఈ సమయంలో రేడియేటర్‌ బిగుసుకుపోయే సమస్య వస్తుంటుంది. విరుగుడుగా యాంటీ ఫ్రీజ్‌లు ఉపయోగించాలి. కూలెంట్‌లు, యాంటీ ఫ్రీజ్‌లు కలిపిన ఉత్పత్తులు అందుబాటులో ఉన్నాయి.
* చలికాలంలో బ్యాటరీ సమస్యలు ఎక్కువ. ముఖ్యంగా పాతరకం బ్యాటరీల్లో తక్కువ ఉష్ణోగ్రతల కారణంగా ఫ్లూయిడ్లు చిక్కబడతాయి. పెట్రోల్‌, ఆయిళ్ల సరఫరాలో అవాంతరాలు ఏర్పడతాయి. బ్యాటరీ టెర్మినళ్లు తరచూ శుభ్రం చేస్తుండాలి.
* ఇంజిన్‌ ఆయిల్‌ని ఎక్కువ కాలం వాడుతుంటే.. అది ఇంజిన్‌పై ప్రతికూల ప్రభావం చూపిస్తుంది. ఏ కాలంలో అయినా గడువు ముగిసిన ఇంజిన్‌ ఆయిల్‌ను వెంటనే మార్చుతుండాలి.