నలుగురు యువకుల ప్రాణాలు బలి తీసుకున్న సెల్ఫీ సరదా..

గురుగ్రామ్‌: సెల్ఫీ సరదా నలుగురు యువకుల ప్రాణాలను బలి తీసుకుంది. హరియాణాలోని గురుగ్రామ్‌లో నిర్మాణంలో ఉన్న రైల్వే పైవంతెన వద్ద మంగళవారం రాత్రి నలుగురు యువకులు సెల్ఫీ తీసుకుంటుండగా.. రైలు ఢీకొని ప్రాణాలు కోల్పోయారు. దిల్లీ నుంచి అజ్మీర్ వెళ్తున్న జనశతాబ్ది ఎక్స్‌ప్రెస్.. సెల్ఫీ తీసుకుంటున్న నలుగురు యువకులను ఢీకొట్టింది. దీంతో వారు అక్కడికక్కడే ప్రాణాలు కోల్పోయారు. యువకులంతా 18-21 ఏళ్ల వారని రైల్వే పోలీసులు తెలిపారు. రైలు సమీపిస్తున్నప్పటికీ యువకులు పక్కకు తప్పుకోకుండా సెల్ఫీ తీసుకోవడం వల్లే ప్రాణాలు కోల్పోయినట్లు సమాచారం. వారిలో ఒకరు విద్యార్థి కాగా.. మిగిలిన ముగ్గురు యువకులు సెల్‌ఫోన్ దుకాణంలో పనిచేస్తుప్పట్టు గుర్తించారు. ఇలాంటి ఘటనలను ప్రమాదాలుగా రైల్వే పరిగణించడంలేదని ఉన్నతాధికారులు తెలిపారు. వారిని అతిక్రమణదారులుగానే పరిగణిస్తున్నట్లు వివరించారు.