Viveka Murder case: వైఎస్‌ భాస్కర్‌రెడ్డికి ఎస్కార్ట్‌ బెయిల్‌ మంజూరు

హైదరాబాద్‌: మాజీ మంత్రి వైఎస్‌ వివేకానందరెడ్డి హత్యకేసులో నిందితుడు వైఎస్‌ భాస్కర్‌ రెడ్డికి 12 రోజుల  ఎస్కార్ట్‌ బెయిల్‌ మంజూరైంది. అనారోగ్య కారణాల రీత్యా 15 రోజుల మధ్యంతర బెయిల్ ఇవ్వాలని కోరుతూ భాస్కర్‌రెడ్డి సీబీఐ కోర్టులో పిటిషన్‌ దాఖలు చేశారు. దీంతో ఆయన ఆరోగ్య పరిస్థితిపై చంచల్‌గూడ జైలు అధికారులు న్యాయస్థానానికి నివేదిక సమర్పించారు. నివేదిక పరిశీలించిన సీబీఐ కోర్టు భాస్కర్‌రెడ్డికి  సెప్టెంబరు 22 నుంచి వచ్చే నెల 3వ తేదీ వరకు 12 రోజుల పాటు ఎస్కార్ట్‌ బెయిల్‌ మంజూరు చేస్తూ తీర్పు వెలువరించింది. హైదరాబాద్‌ విడిచి వెళ్లరాదని ఆదేశించింది. వివేకా హత్యకేసులో ఏ5 నిందితుడిగా ఉన్న భాస్కర్‌రెడ్డి.. ప్రస్తుతం చంచల్‌గూడ జైలులో రిమాండ్‌ ఖైదీగా ఉన్నారు.