మారుతీరావు చివరిగా ఎవరితో మాట్లాడారు?

కొనసాగుతున్న దర్యాప్తు

హైదరాబాద్‌: సంచలనం సృష్టించిన మారుతీరావు అనుమానాస్పద మృతి కేసులో సైఫాబాద్‌ పోలీసుల దర్యాప్తు కొనసాగుతోంది. హైదరాబాద్‌లో ఖైరతాబాద్‌లోని చింతలబస్తీలో గల వైశ్య భవన్‌లో మారుతీరావు మృతి చెందిన విషయం విదితమే. ఆయన ఆత్మహత్య చేసుకుని ఉంటే కేవలం కూతురు దూరమైందన్న బాధ మాత్రమేనా, ఇతర కారణాలు ఏమైనా ఉన్నాయా అనే కోణంలోనూ దర్యాప్తు సాగిస్తున్నారు. మారుతీరావు శరీరావయవాలను ఫోరెన్సిక్‌ ల్యాబ్‌కు తరలించిన నేపథ్యంలో నివేదిక రావడానికి కనీసం రెండు వారాల సమయం పట్టనుంది. ఆలోపు చేయాల్సిన కార్యాచరణపై దృష్టి సారించారు. ఇప్పటికే అతను విష ప్రభావంతోనే మరణించినట్లు పోలీసులకు ఉస్మానియా వైద్యులు ప్రాథమిక సమాచారం ఇచ్చినట్లు తెలిసింది. శరీరంపై ఎలాంటి గాయాలు లేవన్న విషయాన్నీ వివరించారు. మారుతీరావు మరణం తర్వాత అతడు చనిపోయిన గది నుంచి ఇప్పటికే సూట్‌కేసు, సెల్‌ఫోన్‌, పలు పత్రాలు స్వాధీనం చేసుకున్న పోలీసులు అతనితో చివరి రెండు, మూడు రోజుల్లో మాట్లాడిన కాల్‌డాటాపైనా దృష్టి సారించినట్లు సమాచారం. కొంత సమాచారాన్ని సేకరించాక ఆయనతో టచ్‌లో ఉన్న వారిని పిలిచి విచారించే అవకాశాలు కనిపిస్తున్నాయి.