అప్పుల బాధతో కౌలురైతు ఆత్మహత్య

రామడుగు, న్యూస్‌టుడే: అప్పుల బాధతో కౌలురైతు ఆత్మహత్య చేసుకున్న ఘటన కరీంనగర్‌ జిల్లా రామడుగు మండలంలో చోటు చేసుకుంది. స్థానికుల కథనం ప్రకారం..దేశ్‌రాజ్‌పల్లి గ్రామానికి చెందిన కంకనాల రమేశ్‌ (43)కు సొంతంగా 0.30 ఎకరాల భూమి ఉంది. సాగునీటి వసతి లేకపోవడంతో రెండేళ్లుగా ఎకరంన్నర భూమి కౌలుకు తీసుకొని వరి సాగు చేస్తున్నారు. ఈ యాసంగి సీజన్‌లో వరిపంటకు మెడవిరుపు తెగులు సోకి దిగుబడి రాక తీవ్రంగా నష్టపోయారు. గత, ప్రస్తుత అప్పులు మొత్తం రూ.3 లక్షలకు చేరుకోవడంతో దిగులు చెందిన రమేశ్‌ శుక్రవారం పురుగు మందు తాగారు. స్థానికులు గమనించి తొలుత కరీంనగర్‌ జిల్లా ఆసుపత్రికి, అక్కడి నుంచి వరంగల్‌ ఎంజీఎం ఆసుపత్రికి తీసుకెళ్లగా చికిత్స పొందుతూ శనివారం తెల్లవారుజామున మృతి చెందారు. రమేశ్‌కు భార్య, కుమారుడు, కుమార్తె ఉన్నారు. రామడుగు పోలీసులు కేసు నమోదు చేసుకొని దర్యాప్తు చేస్తున్నారు.