నలుగురు కుమారులున్నా నిరాదరణ... వృద్ధురాలి ఆత్మహత్య!

వీపనగండ్ల, న్యూస్‌టుడే: నలుగురు కుమారులున్నా.. నిరాదరణకు గురైన ఓ వృద్ధురాలు.. మనోవేదనతో ఒంటికి నిప్పంటించుకొని ఆత్మహత్యకు పాల్పడ్డారు. వనపర్తి జిల్లా వీపనగండ్ల మండల కేంద్రంలో ఈ ఘటన జరిగింది. ఎస్సై రామన్‌గౌడ్‌, స్థానికులు తెలిపిన వివరాల ప్రకారం.. వీపనగండ్లకు చెందిన కోమటి సరోజమ్మ(78) వృద్ధాప్య సమస్యలతో బాధపడుతున్నారు. ఆమెకు నలుగురు కుమారులున్నా ఎవరూ చేరదీయకపోవడంతో మనోవేదనకు గురయ్యారు. ఈ విషయాన్ని ఇరుగుపొరుగువారికి చెప్పి బాధపడేవారు. ఈ క్రమంలో తీవ్ర మనస్తాపంతో గురువారం ఆమె ఒంటికి నిప్పంటించుకున్నారు. చుట్టుపక్కల వారు గమనించి, మంటలను ఆర్పి స్థానిక ఆరోగ్య కేంద్రానికి తరలించారు. అనంతరం మెరుగైన చికిత్స కోసం జిల్లా ఆసుపత్రికి తీసుకెళ్తుండగా, మార్గంలోనే ఆమె మృతి చెందారు. ఈ ఘటనపై కేసు నమోదు చేసి దర్యాప్తు చేస్తున్నట్టు ఎస్సై తెలిపారు.