Telangana: వేర్వేరు రోడ్డు ప్రమాదాల్లో ఏడుగురి దుర్మరణం.. నలుగురికి తీవ్రగాయాలు

ఇంటర్నెట్‌డెస్క్‌: తెలంగాణలో జరిగిన వేర్వేరు రోడ్డు ప్రమాదాల్లో ఏడుగురు మృత్యువాత పడ్డారు. సంగారెడ్డి, వికారాబాద్‌ జిల్లాల్లో గురువారం ఈ ఘటనలు చోటుచేసుకున్నాయి. సంగారెడ్డి జిల్లా అందోల్‌ మండలం కన్సాన్‌ పల్లి వద్ద జాతీయ రహదారిపై ఆర్టీసీ బస్సు-కారు ఢీకొన్నాయి. ఈ ప్రమాదంలో కారులో ప్రయాణిస్తున్న నలుగురు అక్కడికక్కడే మృతిచెందారు. పొగమంచు కారణంగా రోడ్డు సరిగా కనిపించకపోవడమే ప్రమాదానికి కారణంగా తెలుస్తోంది. 

మరోవైపు వికారాబాద్‌ జిల్లా ధారూరు మండలం బాచారం వంతెన సమీపంలో లారీ, ఆటో ఢీకొన్నాయి. ఈ ఘటనలో ముగ్గురు అక్కడికక్కడే మృతిచెందారు. మృతులు పెద్దేముల్ మండలం మదనంతపూర్‌ గ్రామానికి చెందిన వారిగా తెలిసింది. ఇదే ప్రమాదంలో మరో నలుగురికి తీవ్ర గాయాలయ్యాయి. చికిత్స నిమిత్తం వారిని వికారాబాద్‌ ప్రభుత్వ ఆస్పత్రికి తరలించారు.