పెన్సిల్‌తో అద్భుతాలు.. జీవం ఉట్టిపడేలా చిత్రాలు

చిత్రలేఖనంలో ఖానాపూర్‌ యువకుడి ప్రతిభ

హీరో రామ్‌, విజయ్‌ దళపతి చిత్రాలు

ఖానాపూర్‌, న్యూస్‌టుడే: చిన్నప్పటి నుంచి బొమ్మలు వేయడమంటే అమితాసక్తి ప్రదర్శించే ఆ యువకుడు పెన్సిల్‌తో అద్భుతాలు సృష్టిస్తున్నాడు. బొమ్మను చూస్తే చాలు ఉన్నది ఉన్నట్టు గీస్తూ ఔరా అనిపిస్తున్నాడు. పట్టణంలోని శ్రీరాంనగర్‌ కాలనీకి చెందిన ఆడెపు గణేష్‌ డిగ్రీ వరకు చదివారు. కేవలం పెన్సిల్‌తోనే జీవం ఉట్టిపడేలా, ఆకట్టుకొనేలా బొమ్మలు వేస్తూ తన కళా ప్రతిభను చాటుతున్నారు. సినీ కథానాయకులు రామ్‌, విజయ్‌ దళపతి, కథానాయిక అనుపమ పరమేశ్వరన్‌ చిత్రాలు వేశార[ు. ఆకుపచ్చ, నలుపు, నీలి రంగు పెన్నులను వినియోగించి దుర్గాదేవి అమ్మవారు త్రిశూలం చేతబూనినట్టు వేసిన చిత్రం ఎంతో కళాత్మకంగా రూపుదిద్దుకుంది. అంజన్న స్వామితోపాటు ఇతర దేవతల చిత్రాలు సైతం వేసి మెప్పించారు. జాతిపిత మహాత్మాగాంధీ చిత్రాన్ని ఈతరానికి తగ్గట్టు గీయగా ఆకట్టుకుంటుంది. మనిషిని చూసి బొమ్మ వేయమంటే చాలు నిమిషాల్లోనే వేసేస్తారు. గణేష్‌ తన కుటుంబంలోని చిన్నారుల చిత్రాలను ఉన్నది ఉన్నట్టు వేసి మెప్పించారు. తాను నేర్చుకున్న చిత్రకళా రంగాన్నే ఉపాధి మార్గంగా ఎంచుకుని ప్రస్తుతం గోడరాతలు, ఆలయాలకు పెయింటింగ్స్‌ వంటివి వేస్తున్నారు.

గణేష్‌ వేసిన హీరోయిన్‌ అనుపమ పరమేశ్వరన్‌ చిత్రం