మానవత్వం చాటిన సీటీటీఐ

ఆసుపత్రిలో క్షేమంగా ఉన్న సీమా, బాలుడిని లాలిస్తున్న సీటీటీఐ సతీమణి

గుంతకల్లు, న్యూస్‌టుడే: రైలులో విధులు నిర్వహిస్తున్న చీఫ్‌ టికెట్‌ ఇన్‌స్పెక్టర్‌ మానవత్వాన్ని చాటుకున్నారు. ఈ సంఘటన శనివారం తెల్లవారుజామున యశ్వంతపూర్‌ - గొరఖ్‌పూర్‌ రైలులో చోటుచేసుకుంది. అయోధ్యకు చెందిన హరీష్‌పాండే, గర్భిణి అయిన ఇతని భార్య సీమా రైలులో ప్రయాణిస్తున్నారు. సీమాకు పురిటినొప్పులు రావడంతో డోన్‌కు చెందిన ధర్మవరం డిపోలో పని చేస్తున్న చీఫ్‌ టికెట్‌ ఇన్‌స్పెక్టర్‌ నాగేంద్రయ్య, మరో రైల్వే ఉద్యోగి అబ్దుల్‌ రవూఫ్‌ డోన్‌లో రైలును ఆపారు. విధులు ముగించుకున్న సీటీటీఐ ఆమెను ఆసుపత్రికి తరలించారు. ఆమె మగబిడ్డకు జన్మనిచ్చింది. సీటీటీఐతో పాటు ఆయన సతీమణి ఆసుపత్రికి వెళ్లి సీమాకు అవసరమైన ఆహారాన్ని, దుప్పట్లను అందజేశారు. వారికి భార్యాభర్తలు కృతజ్ఞతలు తెలియజేశారు.