సొంత చెల్లి చీరపైనా దిగజారుడు మాటలా?

సీపీఐ రాష్ట్ర కార్యదర్శి రామకృష్ణ

ఆజాద్‌నగర్‌ (అనంతపురం), న్యూస్‌టుడే: ముఖ్యమంత్రి హోదాలో ఉండి సొంత చెల్లెలు ధరించిన చీర గురించి నోటికొచ్చినట్లు మాట్లాడటం జగన్‌ దిగుజారుడు తనానికి పరాకాష్ట అని సీపీఐ రాష్ట్ర కార్యదర్శి రామకృష్ణ వ్యాఖ్యానించారు. వివేకా హత్య కేసులో అన్ని వేళ్లూ అవినాష్‌రెడ్డి వైపు చూపిస్తోంటే.. జగన్‌ మాత్రం అవినాష్‌ చిన్న పిల్లవాడని వెనకేసుకు రావడం సిగ్గుచేటన్నారు. శుక్రవారం అనంతపురం నగరంలోని నీలం రాజశేఖర్‌రెడ్డి భవనంలో విలేకరుల సమావేశంలో మాట్లాడారు. హత్యకేసులో ఆరోపణలు ఎదుర్కొంటున్న అవినాష్‌ పట్ల సానుభూతిగా మాట్లాడటం కేసును ప్రభావితం చేసేలా ఉన్నాయన్నారు. ప్రతిపక్షంలో ఉన్నపుడు వివేకాను చంద్రబాబు చంపించారని తప్పుడు మాటలు మాట్లాడిన జగన్‌.. ఐదేళ్లు అధికారంలో ఉన్నా వివేకా నిందితులను ఎందుకు పట్టుకోలేదని ప్రశ్నించారు. వచ్చే మే నెలలో సామాజిక పింఛన్లు సచివాలయ సిబ్బంది ఇళ్ల వద్దకు వెళ్లి పంపిణీ చేయాలన్నారు. ఒకవేళ అలా చేయని పక్షంలో తమ పార్టీ నిరసన కార్యక్రమాలు చేపడుతుందని హెచ్చరించారు. రాజ్యాంగ వ్యవస్థలంటే నమ్మకం లేని భాజపా కేంద్రంలో మరోసారి అధికారంలోకి వస్తే ఎస్సీ, ఎస్టీ, బీసీ రిజర్వేషన్లను రద్దు చేస్తారన్నారు. పదేళ్ల భాజపా పాలనలో శాసన, న్యాయవ్యవస్థలు, ప్రభుత్వ యంత్రాంగాన్ని గుప్పిట్లో పెట్టుకుని రాజకీయం చేశారన్నారు. సీపీఐ జిల్లా కార్యదర్శి, అర్బన్‌ ఎమ్మెల్యే ఇండియా కూటమి అభ్యర్థి జాఫర్‌, ఎంపీ అభ్యర్థి మల్లికార్జున సీపీఐ నాయకులు రాజారెడ్డి పాల్గొన్నారు.