పోలీసుల అత్యుత్సాహం

జూదమాడటానికి వచ్చాడని రైతుపై దాడి

గాయపడిన రైతు సోమశేఖర్‌

హిందూపురం, న్యూస్‌టుడే: హిందూపురం గ్రామీణ మండలం రాచపల్లి వద్ద జూదం ఆడుతున్నారన్న సమాచారంతో పోలీసులు సోమవారం సాయంకాలం తనిఖీకి వెళ్లారు. అక్కడ కొందరు జూదరులు పట్టుబడ్డారు. ఆ సమయంలో అదే దారిలో పొలం వద్దకు ద్విచక్ర వాహనంలో వెళ్తున్న రైతు సోమశేఖర్‌ను జూదం ఆడటానికి వచ్చాడని భావించి పోలీసులు పట్టుకొన్నారు. ఆయన భయపడి పారిపోవడానికి యత్నించడంతో పోలీసులు తీవ్రంగా కొట్టి స్టేషన్‌కు తీసుకొచ్చారు. కంటి వద్ద గాయాలు కావడం, చేయి విరగడాన్ని పోలీసులు స్టేషన్‌లో గుర్తించారు. దీనికి తోడు జూదంతో రైతుకు సంబంధం లేదని తెలుసుకొన్న అధికారి, వెంటనే రైతును ఆసుపత్రిలో చేర్పించాలని పోలీసులకు ఆదేశాలు ఇచ్చారు. రైతును కొట్టిన విషయం వివాదాస్పదం కావడంతో మిగిలిన జూదరులనూ వదిలేశారు. తాము దాడులకే వెళ్లలేదని చెప్పుకోవడానికి ఇలా చేసినట్లు సమాచారం. అయితే పోలీసులు తనపై దాడి చేసిన విషయమై రైతు, వారి బంధువులు మీడియా ఎదుట ఆవేదన వ్యక్తం చేశారు.