YS Jagan: ‘ఆ నలుగురు చాలు ఓడించేందుకు’.. ఎమ్మెల్యే కిలివేటితో సీఎం జగన్‌

ఈనాడు, తిరుపతి: ముఖ్యమంత్రి జగన్‌మోహన్‌రెడ్డి(YS Jagan) శుక్రవారం తాడేపల్లిలో సూళ్లూరుపేట ఎమ్మెల్యే కిలివేటి సంజీవయ్య, డీసీసీబీ ఛైర్మన్‌ సత్యనారాయణరెడ్డి, చెంగాళమ్మ ఆలయ ధర్మకర్తల మండలి ఛైర్మన్‌ దువ్వూరు బాలచంద్రారెడ్డి కలిశారు. ఈ సందర్భంగా పలు ఆసక్తికర విషయాలు చర్చకు వచ్చినట్లు తెలిసింది. సూళ్లూరుపేట అభ్యర్థిత్వంపై చర్చకు వచ్చింది. సూళ్లూరుపేటలో డాక్టర్‌ గోపీనాథ్‌ గట్టి పోటీ ఇవ్వలేరని సత్యనారాయణరెడ్డి సీఎం దృష్టికి తీసుకెళ్లారు. దీనిపై కలుగజేసుకున్న సీఎం.. గోపీనాథ్‌ అని ఎవరు చెప్పారన్నారు. సంజీవయ్యను సత్యవేడుకు పంపి, తిరుపతి ఎంపీ గురుమూర్తిని సూళ్లూరుపేటకు తీసుకురావాలని అన్నట్లు తెలిసింది. దీనిపై స్పందించిన ఎమ్మెల్యే తనకు తమిళం రాదని చెప్పారు. నీకు తమిళం వచ్చని అనుకున్నానని సీఎం పేర్కొన్నట్లు సమాచారం. నిన్ను చాలా మంది వ్యతిరేకిస్తున్నారని అనగా.. నన్ను వ్యతిరేకిస్తున్నది నలుగురు మాత్రమేనని ఎమ్మెల్యే సమాధానమిచ్చారు. ఆ నలుగురు చాలు ఓడించేందుకు అని సీఎం అన్నట్లు సమాచారం. గెలిపించడం చాలా కష్టమని, ఓడించడం చాలా సులువు అని కూడా ఈ సందర్భంగా జగన్‌ అన్నారని తెలిసింది. చివరగా సీఎం వెళ్తూ.. ధనంజయరెడ్డిని మాట్లాడమని సూచించినట్లు తెలిసింది.