పెద్దిరెడ్డి 142 ఆస్తుల వివరాలు వెల్లడించలేదు

చర్యలు తీసుకోవాలని సీఈసీని కోరిన బీసీవైపీ అధినేత

ఈనాడు, చిత్తూరు: ఎన్నికల అఫిడవిట్‌లో మంత్రి పెద్దిరెడ్డి రామచంద్రారెడ్డి తన ఆస్తులకు సంబంధించి పూర్తి వివరాలు బహిర్గతం చేయలేదని భారత చైతన్య యువజన పార్టీ (బీసీవైపీ) అధినేత రామచంద్ర యాదవ్‌ ఆరోపించారు. పెద్దిరెడ్డి, ఆయన భార్య స్వర్ణలత పేరిట ఉన్న 142 ఆస్తుల వివరాలు ప్రస్తావించనందున అనర్హత వేటు వేయాలని కోరుతూ ప్రధాన ఎన్నికల కమిషనర్‌ (సీఈసీ) రాజీవ్‌కుమార్‌కు ఈనెల 6న ఆయన లేఖ రాశారు. మంగళవారం ఈ ప్రతిని మీడియాకు విడుదల చేశారు. జిల్లాలోనే వెల్లడించని ఆస్తులు ఇన్ని ఉంటే రాష్ట్రం, దేశవిదేశాల్లో ఇంకెన్ని భూములు, స్థలాలు కూడబెట్టారో అంతుపట్టడం లేదన్నారు. ఎన్నికల నియమావళి, చట్టాలు ఉల్లంఘించినందున 2024 ఎన్నికల్లో ఆయన పోటీ చేయకుండా చూడాలన్నారు. రామచంద్ర యాదవ్‌ పేర్కొన్న వివరాల మేరకు పెద్దిరెడ్డికి పుంగనూరు, చౌడేపల్లె, పులిచెర్ల మదనపల్లె, తిరుపతి గ్రామీణ, రేణిగుంట, ఏర్పేడు మండలాల్లో భూములున్నాయి. ఎక్కువగా ఆయన ప్రాతినిథ్యం వహిస్తోన్న పుంగనూరులోనే ఉన్నాయి. సింహభాగం ఆయన భార్య స్వర్ణలత పేరిటే ఉన్నాయి.  పి.స్వర్ణలత పేరుతో పుంగనూరులోని సర్వే నంబర్లు 255/5బి, 267/1బి, 267-1ఎ/3ఏ, 267-2బి, 268/3, 472/1, పి.రామచంద్రారెడ్డి పేరిట రాగానిపల్లెలోని సర్వే నంబర్లు  289ఏ, 291/1, 291/2, 291/3 స్థలాలు ఉన్నా అఫిడవిట్‌లో చూపలేదని పేర్కొన్నారు.