వైకాపా ప్రచారంలో క్షేత్ర సహాయకుడు

సంజాయిషీ నోటీసు జారీ

శావల్యాపురం, న్యూస్‌టుడే : ఎన్నికల కోడ్‌ వచ్చినా కొంతమంది ప్రభుత్వ ఉద్యోగులు, ఒప్పంద సిబ్బంది ఇంకా వైకాపా ప్రజాప్రతినిధులతో కలిసి ప్రచారంలో పాల్గొంటున్నారు. ఇలాంటి వారిని జిల్లా అధికారులు విధుల నుంచి తొలగిస్తున్నా ఇంకా కొంతమంది సమావేశాలు, ప్రచారంలో పాల్గొంటున్నారు. తాజాగా శావల్యాపురం మండలం వేల్పూరులో బుధవారం స్థానిక ఎమ్మెల్యే బొల్లా బ్రహ్మనాయుడు కల్యాణ మండపంలో వైకాపా నేతలతో ఆత్మీయ సమావేశం నిర్వహించారు. దీనికి వైకాపా నరసరావుపేట పార్లమెంటు అభ్యర్థి పి.అనిల్‌కుమార్‌ యాదవ్‌తో పాటు, స్థానిక ఎమ్మెల్యే పాల్గొన్నారు. సమావేశం అనంతరం మండలంలోని నాయకులతో పరిచయం చేపట్టారు. దీనిలో మండలంలోని చినకంచర్లకు చెందిన ఉపాధి హామీ క్షేత్రసహాయకుడు ముండ్రు ప్రభు పాల్గొని నేతలతో కరచాలనం చేశారు. ఈ విషయాన్ని ఎంపీడీవో కొర్రపాటి కవితా చౌదరి దృష్టికి తీసుకెళ్లగా అతనికి శ్రీముఖం జారీ చేశామని, జిల్లా డ్వామా పీడీ జోసఫ్‌కుమార్‌కు కూడా ఆధారాలతో తెలియజేశామని, ఆయన ఆదేశాల మేరకు చర్యలు చేపడతామని పేర్కొన్నారు.