నాకు తెలియదు.. నాకు తెలియదు

 ప్రధానమంత్రి అఫిడవిట్‌ను తీసుకువచ్చిన వైకాపా అభ్యర్థి
 ఏకపక్ష నిర్ణయం తీసుకున్నారన్న కూటమి నాయకులు

 పొన్నూరు, న్యూస్‌టుడే: పొన్నూరు వైకాపా ఎమ్మెల్యే అభ్యర్థి అంబటి మురళీకృష్ణ భార్య, కుమార్తె ఆస్తుల వివరాలను అఫిడవిట్‌లో ఎందుకు పొందుపరచలేదని కూటమి నాయకులు ప్రశ్నిస్తే.. నాకు తెలియదు..  నాకు తెలియదు.. చెప్పడం ఏమిటిని పలువురు తప్పుపడుతున్నారు. పొన్నూరు అసెంబ్లీ నియోజకవర్గ రిటర్నింగ్‌ అధికారి ఆలపాటి లక్ష్మీకుమారి ఆధ్వర్యంలో అధికారులు శుక్రవారం నామినేషన్ల పత్రాలను పరిశీలించారు. పొన్నూరు వైకాపా అభ్యర్థి మురళీకృష్ణ ఈ నెల 22వ తేదీన మొదటి సెట్టు నామినేషన్లు దాఖలు చేశారు. అప్పుడు వైకాపా బీఫాం పత్రాలను ఆయన సమర్పించలేదు. మరలా 24వ తేదీన ఆయన మరో రెండు సెట్లు నామినేషన్లు అందజేశారు. వైకాపా అభ్యర్థి నిబంధనలకు విరుద్ధంగా వ్యవహరించారని అభ్యంతరం తెలుపుతూ కూటమి అభ్యర్థి ధూళిపాళ్ల నరేంద్రకుమార్‌ మరో ఫిర్యాదు లేవనెత్తారు. తన భార్య, కుమార్తె ఆస్తుల వివరాలు తనకు తెలియదని మురళీకృష్ణ చెప్పడంపై విమర్శలు వెలువడుతున్నాయి. మురళీకృష్ణ మాట్లాడుతూ ఉత్తరప్రదేశ్‌ రాష్ట్రం వారణాసి పార్లమెంటు స్థానానికి ప్రధానమంత్రి  మోదీ దాఖలు చేసిన అఫిడవిట్‌లో భార్య ఆస్తుల వివరాలు పొందుపరచలేదని, ఆ అఫిడవిట్‌ పత్రాలు అధికారులకు అందచేసేందుకు ప్రయత్నించగా రిటర్నింగ్‌ అధికారులు తిరస్కరించారు.