లోకేశ్‌తో చిరువ్యాపారులకు మంచి రోజులు

ఆకుకూరలు విక్రయిస్తున్న మహిళతో మాట్లాడుతున్న బ్రాహ్మణి

మంగళగిరి, న్యూస్‌టుడే: నారా లోకేశ్‌ ఎమ్మెల్యే అయితే మంగళగిరిలో చిరు వ్యాపారులకు మంచి రోజులొస్తాయని, సైకిల్‌ గుర్తుపై ఓటేసి ఆయన్ను భారీ మెజార్టీతో గెలిపించాలని నారా బ్రాహ్మణి పిలుపునిచ్చారు. మంగళగిరిలో ఎన్నికల ప్రచారంలో భాగంగా సోమవారం సాయంత్రం ఆమె కాళీ మాత ఆలయం వద్ద ఉన్న కూరగాయ వ్యాపారులతో మాట్లాడారు. ప్రతి దుకాణం వద్దకు వెళ్లి ఆప్యాయంగా పలకరిస్తూ వారి కష్టాలను తెలుసుకున్నారు. తొలుత అమ్మవారి ఆలయంలో ప్రత్యేక పూజలు నిర్వహించారు. సరైన మార్కెట్‌ లేక రోడ్లపై బండ్లు ఏర్పాటు చేసుకుని కూరగాయలు విక్రయిస్తున్నామని పలువురు ఆమె దృష్టికి తీసుకొచ్చారు. అందరికీ ఆమోద యోగ్యంగా పట్టణంలో కూరగాయల మార్కెట్‌ అందుబాటులోకి తీసుకొస్తామని భరోసా ఇచ్చారు.  ఎండనక, వాననక కష్టపడుతున్న అందరికీ కూటమి ప్రభుత్వంతో భరోసా వస్తుందని చెప్పారు. ఆమె వెంట తెలుగు మహిళా నాయకులు పాల్గొన్నారు.