మాజీ మంత్రి పుష్పలీల భర్త రాందాస్‌ మృతి

రాజేంద్రనగర్‌, న్యూస్‌టుడే: మాజీ మంత్రి కొండ్రు పుష్పలీల భర్త, జిల్లా కోఆపరేటివ్‌ సెంట్రల్‌ బ్యాంక్‌(డీసీసీబీ) సీఈవోగా పనిచేసి పదవి విరమణ చేసిన కొండ్రు రాందాస్‌(69) సోమవారం గుండెపోటుతో మృతి చెందారు. రాజేంద్రనగర్‌ సర్కిల్‌ ఉప్పర్‌పల్లి సన్‌రైస్‌హోమ్స్‌లోని తమ నివాసంలో ఉండగా గుండెపోటు రావడంతో నిమ్స్‌కు తరలించారు. అప్పటికే ఆయన మరణించినట్లు వైద్యులు తెలిపారు. రాందాస్‌ కొంతకాలంగా అనారోగ్య సమస్యలతో బాధపడుతున్నారు. ఆయన మరణవార్త విని ఇబ్రహీంపట్నం నియోజకవర్గ ప్రజలు, వివిధ పార్టీల నాయకులు రాజేంద్రనగర్‌లోని ఆయన నివాసానికి తరలివచ్చి నివాళులర్పించారు. ఆయనకు కుమారుడు సుమన్‌, కుమార్తె సుష్మ ఉన్నారు. తెదేపా రాష్ట్ర అధ్యక్షుడు బక్కని నర్సింహులు, ఎమ్మార్పీఎస్‌ జాతీయ అధ్యక్షులు మందకృష్ణమాదిగ తదితరులు నివాళులర్పించారు. బంజారాహిల్స్‌లోని మహాప్రస్థానంలో ఆయన అంత్యక్రియలు జరిగాయి.