ఆడబిడ్డల అవస్థలపై చలించిన కేటీఆర్‌

వెంకటయ్య కుమార్తెలను పరామర్శిస్తున్న జక్కా వెంకట్‌రెడ్డి, డాక్టర్‌ విజయలక్ష్మి

పీర్జాదిగూడ(బోడుప్పల్‌), న్యూస్‌టుడే: పీర్జాదిగూడ చెన్నారెడ్డి కాలనీలో నివసించే వెంకటయ్య, శకుంతల దంపతులది రెక్కాడితే కానీ డొక్కాడని పరిస్థితి. అయిదుగురు కుమార్తెల్లో హేమలత(31), స్వర్ణలత(28), మనీష(22) ‘మస్క్యులర్‌ డిస్టోఫ్రి’ సమస్యతో నడవలేరు, నిలబడలేరు. ఈ దీనావస్థను వీడియో తీసిన యువకుడు శివ ముదిరాజ్‌ మంత్రి కేటీఆర్‌కు ట్వీట్‌ చేశారు. చలించిన మంత్రి ఆదివారం పీర్జాదిగూడ మేయర్‌ జక్కా వెంకట్రెడ్డిని వారి ఇంటికి పంపించి ఫోన్‌లో పరామర్శించారు. ఇన్‌స్టిట్యూట్‌ ఆఫ్‌ జెనెటిక్స్‌ డైరెక్టర్‌ డా.విజయలక్ష్మి మేయర్‌తో కలిసి ఆ యువతులను పరామర్శించారు. ఆమెతో మంత్రి మాట్లాడి.. యువతులకు మెరుగైన వైద్యం అందించాల్సిందిగా సూచించారు. కేటీఆర్‌ సూచనతో మేయర్‌ వెంకట్‌రెడ్డి, కార్పొరేటర్లు కె.కుమార్‌, సుభాష్‌నాయక్‌ స్పందించి రూ.లక్ష తక్షణ సాయం చేశారు. కార్పొరేషన్‌లో ఉద్యోగం ఇస్తామని ప్రకటించారు.