బస్సు జాడ తెలిసేదెలా..?

ఊసేలేని వెహికిల్‌ ట్రాకింగ్‌ సిస్టం

ఈనాడు - హైదరాబాద్‌: నగరంలో 29 ఆర్టీసీ డిపోల్లో మూడింటిని పక్క డిపోల్లో కలిపేశారు. నగర విస్తీర్ణం బాగా పెరిగింది. ఔటర్‌ రింగురోడ్డు చుట్టూ కొత్త నివాసాలు వెలిశాయి. బస్సులు గణనీయంగా తగ్గిపోయాయి. ఉన్న వాటితో  నాణ్యమైన సేవలందిస్తామని చెప్పిన శాఖ అధికారులు.. ఆ దిశగా ఒక్క అడుగు పడలేదు. బస్సుల జాడ తెలిపేందుకు వీటీఎస్‌(వెహికల్‌ ట్రాకింగ్‌ సిస్టమ్‌)ను అందుబాటులోకి తెస్తామని చెప్పినా.. ఆ ఊసే లేకుండా పోయింది. ప్రతి నెల చివరి సోమవారం ఆర్టీసీ గ్రేటర్‌హైదరాబాద్‌ జోన్‌ అధికారితో పాటు.. ఆర్‌ఎంలు, డీవీఎంలు, డిపో మేనేజర్లు క్రమం తప్పకుండా ‘డయల్‌ యువర్‌ ఆర్టీసీ ఆఫీసర్‌’ కార్యక్రమాలు చేపట్టేవారు. ఈ కార్యక్రమాన్ని సైతం గాలికొదిలేశారు. టీఎస్‌ఆర్టీసీ గ్రేటర్‌జోన్‌లో బస్సులు నడిచే తీరుపై పరీక్షించేవారే కరవయ్యారు. కళాశాలల సమయాల్లో నగర శివార్లలో తూతూమంత్రంగా అధికారులు క్షేత్రస్థాయిలో గమనించడం.. తర్వాత పట్టించుకోకపోవడం జరుగుతోందనే విమర్శలున్నాయి.