అన్ని వర్గాల సంక్షేమమే మా అభిమతం: రోహిత్‌రెడ్డి

యాలాల, న్యూస్‌టుడే: రాష్ట్రంలో అన్ని వర్గాల సంక్షేమం భారాసతోనే సాధ్యమని ఎమ్మెల్యే రోహిత్‌రెడ్డి అన్నారు. సోమవారం పల్లెపల్లెకు పైలెట్‌ కార్యక్రమంలో భాగంగా యాలాల మండలంలోని రాస్నం, గంగాసాగర్‌, సంగాయిపల్లి తండా, సంగాయిపల్లి మీది తండా, సంగాయిపల్లి కింది తండా, పగిడియాల, బాగాయిపల్లి, అచ్యుతాపూర్‌ గ్రామాలలో ఎంపీపీ బాలేశ్వర్‌గుప్తాతో కలిసి రోహిత్‌రెడ్డి పర్యటించారు. ఈ సందర్భంగా మాట్లాడుతూ.. సీఎం కేసిఆర్‌ కృషితో తాండూరు నియోజవర్గానికి మునుపెన్నడూ లేని విధంగా నిధులు తీసుకువచ్చి అభివృద్ధి చేస్తున్నామన్నారు. రాస్నం గ్రామంలో చేపట్టిన పలు పనులను చూసి సర్పంచ్‌ సురేఖను ఎమ్మెల్యే అభినందించారు. అచ్యుతాపూర్‌ గ్రామానికి బస్సు రావడం లేదని గ్రామస్థులు వివరించగా, డిపో మేనేజర్‌తో మాట్లాడారు. కార్యక్రమంలో జిల్లా గ్రంథాలయ ఛైర్మన్‌ రాజుగౌడ్‌, ఎంపీపీ బాలేశ్వర్‌గుప్తా, మండల ఉపాధ్యక్షులు రమేష్‌, భారాస మండల పార్టీ అధ్యక్షులు రవీందర్‌రెడ్డి, జిల్లా కో ఆప్షన్‌ సంఘం అధ్యక్షులు అక్బర్‌బాబా, రాష్ట్ర ఎంపీటీసీల ఫోరం ఉపాధ్యక్షులు పగిడియాల్‌ రాములు తదితరులు పాల్గొన్నారు.