బోరబండలో భానుడు భగభగ

ఈనాడు, హైదరాబాద్‌ : నగరంలో ఎండ తీవ్రత పెరిగింది. పగటిపూట గరిష్ఠ ఉష్ణోగ్రత 38 డిగ్రీలు దాటింది. బుధవారం బోరబండలో అత్యధికంగా 38.4 డిగ్రీలు, బేగంబజార్‌లో 38.2 డిగ్రీలు నమోదైంది. షేక్‌పేట, జూబ్లీహిల్స్‌, చార్మినార్‌, మల్కాజిగిరి, మైత్రీవనం, రాజేంద్రనగర్‌ ప్రాంతాల్లో 37 డిగ్రీలకు పైగా నమోదైంది. గత ఏడాది ఇదే రోజు సీతాఫల్‌మండిలో 39.6 డిగ్రీలు నమోదైంది. గురువారం నగరంలో మధ్యాహ్నం లేదా సాయంత్రం సమయంలో ఆకాశం పాక్షికంగా మేఘావృతమై ఉంటుందని హైదరాబాద్‌ వాతావరణ కేంద్రం తెలిపింది. గరిష్ఠ ఉష్ణోగ్రతలు 37 డిగ్రీలు, కనిష్ఠ ఉష్ణోగ్రతలు 24 డిగ్రీల వరకు ఉండే అవకాశం ఉందని వెల్లడించింది. ఆగ్నేయ దిశ నుంచి గాలులు గంటకు 4 నుంచి 6 కి.మీ. వీచే అవకాశం ఉందని తెలిపారు