రాళ్లే బద్దలవుతుంటే.. రికార్డులెంత

పదేళ్ల నాటి ఉష్ణోగ్రతను దాటి.. 44.5 డిగ్రీల భగభగలు

ఈనాడు, హైదరాబాద్‌: నగరంలో రోజురోజుకు భానుడు మరింత భగ్గుమంటున్నాడు. జీహెచ్‌ఎంసీ పరిధిలో శనివారం రికార్డు స్థాయిలో 44.5 డిగ్రీల అత్యధిక పగటి ఉష్ణోగ్రత నమోదైంది. 2015లో నమోదైన అత్యధిక 44.3 డిగ్రీల రికార్డు శనివారం బద్దలైంది. సాధారణం కంటే నాలుగు డిగ్రీలపైన ఉష్ణోగ్రతలు నమోదవుతున్నాయి. పదిరోజులుగా గరిష్ఠ ఉష్ణోగ్రత 43 డిగ్రీలకు తగ్గడం లేదు. రోజురోజుకు పెరుగుతూ వచ్చింది. ఎండలకు బయటికి వెళ్లాలంటేనే ప్రజలు హడలిపోతున్నారు. అత్యవసరమైతే తప్ప ఉదయం 11 గంటల నుంచి సాయంత్రం 4 గంటల మధ్య బయట తిరగవద్దని వైద్యులు సూచిస్తున్నారు. ఎండ దెబ్బ బారిన పడే ప్రమాదం ఉందని హెచ్చరిస్తున్నారు. ఇంట్లో ఉన్నా.. బయట ఉన్నా ఎక్కువ నీరు తాగాలని సూచిస్తున్నారు.

90 మిలియన్‌ యూనిట్లను దాటింది.. ఉదయం నుంచి ఎండ సెగలు కక్కుతోంది. దీంతో ఇళ్లలో ఫ్యాన్లు, కూలర్లు, ఏసీలు 24 గంటలు పనిచేస్తున్నాయి. రాత్రిపూట మాత్రమే ఏసీ వాడే వారు ఉక్కపోతతో ఉదయంపూట సైతం వినియోగిస్తున్నారు. దీంతో కరెంట్‌ వాడకం పెరిగిందని విద్యుత్తు ఇంజినీర్లు చెప్పారు. సిటీలో శనివారం ఒక్కరోజు వినియోగం 90 మిలియన్‌ యూనిట్లను దాటిందని తెలిపారు.