నిరుద్యోగులకు వరం... డిజిటల్‌ గ్రంథాలయం

ఆన్‌లైన్‌లో పోటీ పరీక్షల సమాచారం

అచ్చంపేట, న్యూస్‌టుడే: సర్కారు కొలువులు దక్కించుకోవడానికి నిరుద్యోగులు ఎంతో కష్టపడుతున్నారు. గతంలో గ్రూపు-1 ప్రిలిమినరీ పరీక్ష రెండు సార్లు రాసినా వివిధ కారణాలతో రద్దు కావడంతో నిరుద్యోగ అభ్యర్థులు తీవ్ర నిరాశకు గురయ్యారు. మళ్లీ పోటీ పరీక్షల నోటిఫికేషన్లు వస్తుండటంతో నిరుద్యోగుల్లో ఆశలు చిగురిస్తున్నాయి. గతంలో పట్టణాలకు వెళ్లి నెలల తరబడి శిక్షణ తీసుకున్నా పరీక్షలు అనుకున్న సమయానికి నిర్వహించకపోవడంతో నిరాశ చెందారు. పార్లమెంట్‌ ఎన్నికల ప్రకటన రావడంతో మరోసారి జాప్యం అయ్యే అవకాశాలు ఉన్నా పోటీ పరీక్షల కోసం సన్నద్ధమయ్యేందుకు కృషి చేస్తున్నారు. నిరుద్యోగులు స్థానికంగా అందుబాటులో ఉండే గ్రంథాలయాలను ఆశ్రయించి పోటీ పరీక్షలకు ఉపయోగపడే పుస్తకాలను చదివేందుకు పరిమితమవుతున్నారు. ఆర్థికంగా మంచి స్థితిలో ఉన్న వారు పోటీ పరీక్షల శిక్షణ కోసం మళ్లీ పట్నం బాట పడుతున్నారు. ఉమ్మడి జిల్లా వ్యాప్తంగా వివిధ పోటీ పరీక్షలపై ఆశలు పెట్టుకొని నిరుద్యోగులు పుస్తకాలతో కుస్తీ పడుతున్నారు. వివిధ కోర్సులు, ఉద్యోగ పరీక్షల్లో విజయం సాధించాలంటే ప్రణాళికతో చదవడానికే పరిమితం కాకుండా పరీక్షల్లో వచ్చే సిలబస్‌కు సంబంధించిన విషయ పరిజ్ఞానం పెంచుకోవడంపై దృష్టి పెట్టాల్సిన అవసరం ఉంది.

నిరుద్యోగులు స్థానికంగా ఉన్న గ్రంథాలయాలు ఉపయోగించుకోవడం వల్ల పూర్తి స్థాయిలో ఉపయోగం ఉండదు. స్థానికంగా కొన్ని రకాల పుస్తకాలు మాత్రమే అందుబాటులో ఉంటాయి. డిజిటల్‌ గ్రంథాలయాన్ని ఉపయోగించు కోవడంపై దృష్టి సారిస్తే పోటీ పరీక్షల సిలబస్‌ పూర్తి స్థాయిలో అందుబాటులో ఉంటుంది. వివిధ ప్రభుత్వ శాఖల్లో ఖాళీగా ఉన్న ఉద్యోగాల భర్తీ కోసం ఇప్పటికే గ్రూపు-1, 2, డీఏవో పోస్టులను భర్తీ చేసేందుకు నిర్వహించే పరీక్షల తేదీలను ఇటీవల టీఎస్‌పీఎస్సీ ఖరారు చేసింది. వీటితో పాటు యూపీఎస్సీ, స్టాఫ్‌ సెలక్షన్‌ కమిషన్‌ (ఎస్‌ఎస్‌సీ), రైల్వే రిక్రూట్‌మెంట్‌ బోర్డు (ఆర్‌ఆర్‌బీ), బ్యాంకింగ్‌ తదితర రంగాల్లో ఖాళీల భర్తీకి ఆయా శాఖలు పోటీ పరీక్షలు ఎప్పటికప్పుడు నిర్వహించనున్నాయి. ఈ పరీక్షల కోసం నిరుద్యోగులు ఇప్పటికే సాధన చేయడం ప్రారంభించారు.

ఇలా ఉపయోగించుకోవాలి

జాతీయ డిజిటల్‌ గ్రంథాలయం (ఎన్‌డీఎల్‌) పేరుతో అందుబాటులో ఉన్న వెబ్‌సైట్‌ను ఖరగ్‌పూర్‌ ఐఐటీ అభివృద్ధి చేసింది. ఇందులోని సమాచారాన్ని ఉచితంగా డౌన్‌లోడ్‌ చేసుకునే వెసులుబాటు ఉంది. ముందుగా నిరుద్యోగ యువత తమ వివరాలను డబ్ల్యూడబ్ల్యూడబ్ల్యూ.ఎన్‌డీఎల్‌.సీవోఎం వెబ్‌సైట్‌లోకి వెళ్లి లాగిన్‌ అవ్వాలి. చరవాణిలో ఎన్‌డీఎల్‌ అని టైప్‌ చేస్తే దీనికి సంబంధించిన యాప్‌ కనిపిస్తుంది. దీన్ని డౌన్‌లోడ్‌ చేసుకొని వివరాలు నమోదు చేయాలి. ఆ తరువాత అవసరమైన సమాచారాన్ని ఎన్‌డీఎల్‌ నుంచి పొందవచ్చు.

అంతర్జాలంలో 68 లక్షల పుస్తకాలు

పోటీ పరీక్షలకు ఉపయోగపడే పుస్తకాలు కొనలేనివారు, శిక్షణ కేంద్రాల్లో ఫీజులు చెల్లించే పరిస్థితులు లేని వారికి అంతర్జాలం తోడ్పాటును అందిస్తోంది. జాతీయ డిజిటల్‌ గ్రంథాలయం (ఎన్‌డీఎల్‌) నిరుద్యోగులకు చక్కటి వేదికగా మారింది. ఆన్‌లైన్‌లో వివిధ పోటీ పరీక్షల సమాచారంతో పాటు ఆయా పరీక్షలకు ఉపయోగపడే సిలబస్‌కు సంబంధించిన పుస్తకాలు ఎన్‌డీఎల్‌లో అందుబాటులో ఉన్నాయి. ఇందులో వివిధ పోటీ పరీక్షలకు ఉపయోగపడే 68 లక్షల పుస్తకాలు నిక్షిప్తమై ఉన్నాయి. జాతీయ విద్య శిక్షణ పరిశోధన సంస్థ (ఎన్‌సీఈఆర్టీ) రూపొందించిన వివిధ పాఠ్యాంశాలకు సంబంధించిన పుస్తకాలు ఎన్‌డీఎల్‌లో అందుబాటులో ఉన్నాయి. దేశంలోని వివిధ విశ్వవిద్యాలయాలు రూపొందించిన పరిశోధన వ్యాసాలు కూడా ఎన్‌డీఎల్‌లో ఉన్నాయి. విషయ పరిజ్ఞానానికి సంబంధించిన ఆరు విభాగాలు ఇందులో ఉన్నాయి. ఏ విభాగానికి సంబంధించిన పుస్తకం కావాలో దానిపై క్లిక్‌ చేస్తే ఆయా పాఠ్యాంశాలకు సంబంధించిన పేజీలు ప్రత్యక్షమవుతాయి.