ఆత్మహత్య చేసుకుంటున్నానని.. యువకుడి వాట్సాప్‌ వీడియో

రక్షించిన పోలీసులు

వంశీని వారిస్తూ..

అల్లాదుర్గం, న్యూస్‌టుడే: చెట్టుకు ఉరేసుకొని ఆత్మహత్య చేసుకుంటున్నానని యువకుడు పంపిన వీడియో గురువారం వాట్సాప్‌ గ్రూపుల్లో వైరల్‌ కావడంతో స్పందించిన పోలీసులు రక్షించారు. గ్రామస్థులు తెలిపిన వివరాలు.. మండలంలోని ముస్లాపూర్‌కు చెందిన వంశీ.. సంగారెడ్డి సమీపంలోని ఓ ఫార్మా కంపెనీలో ఉద్యోగం చేస్తున్నాడు. అత్తామామతోపాటు బంధువులు మోసం చేశారని, మనస్తాపానికి గురై పురుగుల మందు తాగి, ఉరేసుకొని ఆత్మహత్య చేసుకుంటున్నానని గురువారం వాట్సాప్‌లో వీడియో పోస్టు చేశాడు. ‘నాకున్న రెండెకరాల భూమి, ఇంటి స్థలాన్ని అనాథాశ్రమానికి లేదంటే ట్రస్టుకు ఇవ్వండి. నా భార్యకు మాత్రం ఇవ్వరాదు. ఎస్సై ప్రవీణ్‌రెడ్డి సార్‌, సీఐ రేణుక మేడం.. నా మృతికి కారకులైన వారిని కఠినంగా శిక్షించండి.. మిస్‌ యూ కన్నా (కొడుకును ఉద్దేశించి)’ అంటూ వీడియోను సామాజిక మాధ్యమాల్లో పోస్టు చేశాడు. విషయం తెలుసుకున్న ఎస్సై ప్రవీణ్‌రెడ్డి, కానిస్టేబుల్‌తో కలిసి ఫోన్‌ సిగ్నల్‌ ఆధారంగా గ్రామ శివారులోని బల్కం చెరువు కట్ట సమీపంలోని పొలం వద్ద వంశీ ఆచూకీ కనుగొన్నారు. కౌన్సెలింగ్‌ ఇచ్చి కుటుంబ సభ్యులకు అప్పగించారు.