Nalgonda: భారాస అధినేత కేసీఆర్‌ కాన్వాయ్‌లో ప్రమాదం

వేములపల్లి: నల్గొండ జిల్లా వేములపల్లి వద్ద భారాస అధినేత కేసీఆర్‌ కాన్వాయ్‌లో ప్రమాదం జరిగింది. ఒకదానికొకటి ఢీకొనడంతో కాన్వాయ్‌లోని ఎనిమిది వాహనాలు దెబ్బతిన్నాయి. భారాస నేతలకు ప్రమాదం తప్పడంతో అంతా ఊపిరి పీల్చుకున్నారు. ముందు వెళ్తున్న కారు డ్రైవర్‌ సడెన్‌ బ్రేక్‌ వేయడమే ప్రమాదానికి కారణమని తెలుస్తోంది.

బస్సు యాత్ర, రోడ్ షోల ద్వారా లోక్‌సభ ఎన్నికల ప్రచారాన్ని కేసీఆర్‌ ఉద్ధృతం చేశారు. ఇవాళ మిర్యాలగూడ నుంచి ప్రారంభమైన గులాబీ దళపతి యాత్ర వచ్చే నెల పదో తేదీన సిద్దిపేటతో ముగియనుంది. ఈ యాత్ర ద్వారా ఉదయం పూట 12 లోక్‌సభ నియోజకవర్గాల్లో పర్యటించి క్షేత్రస్థాయిలో రైతుల కష్టాలు తెలుసుకోనున్నారు. సాయంత్రం రోడ్‌ షో ద్వారా ముఖ్యమైన ప్రాంతాల్లో ప్రసంగించనున్నారు.